Қўшма Штатлар келажакда ядро арсеналини оширишни истисно этмаяпти, бироқ бу қарорни мамлакатнинг сайланган президенти Дональд Трамп қабул қилади. Бу ҳақда Американинг амалдаги етакчиси Жо Байден маъмуриятидаги манбаларга таяниб, Wall Street Journal (WSJ) хабар берди.
“Агар ҳозирги тенденция давом этса ва вазият салбий томонга ўзгармаса, келажакда АҚШнинг жойлаштирилган ядро қуроллари сонини кўпайтириш зарурати пайдо бўлиши мумкин”, деди исми ошкор этилмаган юқори мартабали амалдори.
Унинг сўзларига кўра, “салбий сценарий” Россия “қурол назоратидан воз кечиши”, Хитой ва Шимолий Корея эса “ўз имкониятларини ошириши” билан боғлиқ.
Хабарда, шунингдек, Конгрессга юбориладиган ядро қуролидан фойдаланиш бўйича махфийлаштирилган ҳисоботда аниқ қадамлар кўрсатилмагани, аммо Қўшма Штатлар ўзининг ядровий имкониятларини, “унинг тузилиши ва ҳажмини” ҳисобга олган ҳолда мослаштириши кераклиги айтилган.
“Бизнинг кўплаб душманларимиз ядро қуролини ўзларининг миллий хавфсизлик стратегияларининг муҳим таркибий қисмига айлантирмоқдалар”, дея қўшимча қилди WSJ.
Нашр, шунингдек, Трамп инаугурациядан сўнг ядровий триаданинг барча қисмларини мустаҳкамлаш учун бир нечта “тайёр вариантларга” эга бўлишини қайд этган.
АҚШ Энергетика вазирлиги аввалроқ Қўшма Штатлар ва Жанубий Корея ядровий экспорт ҳамда ҳамкорлик тамойиллари бўйича дастлабки келишувга эришганини маълум қилган эди. Аниқлик киритилишича, томонлар фуқаролик ядро технологиялари экспорти устидан назоратни кучайтирган.
Изоҳ (0)