Amerikaning Penn Biden Center tahlil markazida AQSHning amaldagi prezidenti Jo Baydenning vitse-prezidentlik davridagi maxfiy hujjatlar topildi. AQSH bosh prokurori Merrik Garland maxfiy hujjatlar qanday qilib tahlil markaziga borib qolganini tekshirishni buyurdi. Bu haqda CBS News xabar berdi.
Hujjatlar yashirin ma’lumotni o‘z ichiga olmagan boshqa qog‘ozlar bilan birga saqlangan. Materiallar noyabr boshida, oraliq saylovlar arafasida Baydenning ishonchli vakillari tomonidan topilgan.
Shundan keyin bu haqda AQSH milliy arxiviga xabar berilgan. Baydenning advokatlari hujjatlarni topshirishni taklif qildi, u vaqtda materiallarni taqdim etish haqida so‘rov hali kelib tushmagandi.
CBS ma’lumotlariga ko‘ra, surishtiruvda FQB (Federal qidiruv byurosi) va Chikago prokurori qatnashmoqda.
AP yozishicha, bu tekshiruvdan qat’i nazar, Jo Bayden maxfiy hujjatlardan noto‘g‘ri foydalanib kelgani prezident uchun siyosiy “boshog‘riq”ga aylanishi mumkin. Avvalroq Bayden o‘zidan avvalgi prezident Donald Tramp bilan yuz bergan shunga o‘xshash vaziyatni tanqid qilib, uning yuzlab maxfiy qaydlarni o‘zining Floridadagi xususiy uyida saqlash qarorini “mas’uliyatsizlik” deb atagandi.
2022-yil avgustida Trampning uyidan maxfiy ma’lumotlardan iborat hujjatlar topilgandi. Sobiq davlat rahbari “Josuslik to‘g‘risidagi qonun”ni buzganlikda gumonlanmoqda. Bu ish bo‘yicha maxsus prokuror tayinlangan.
Izoh (0)