2024-yil ajoyib kinoyangiliklarga boy bo‘ldi. Ammo premyerasi orziqib kutilgan filmlar tomoshabinlarning hafsalasini pir qildi, ba’zi loyihalar esa umuman janjalli filmlarga aylandi.
“Qarg‘a” (2024)
Afsuski, film prokatda omadsizlikka uchradi va tanqidchilardan nihoyatda salbiy baholar oldi. Ayrimlar kinoni zerikarli va o‘ziga xoslikdan mahrum deb atashdi, boshqalar esa asosiy rol ijrochilari o‘rtasida hech qanday ta’sirchanlik yo‘qligini ta’kidlashdi. 1994-yilda suratga olingan original “Qarg‘a” filmining rejissyori filmning remeykini tomosha qilishdan bosh tortdi va ijodkorlarni faqat pul orttirish ishtiyoqida aybladi. Tomoshabinlar ham norozilik bildirishdi.
“Joker: ikki kishilik telbalik” (2024)
Qizig‘i shundaki, chiqishidan bir necha oy oldin “Joker: ikki kishilik telbalik” 2024-yilning ikkinchi yarmidagi eng kutilgan film sifatida Astra Midseason Movie mukofotiga sazovor bo‘ldi. Biroq kartina mutaxassislar bashorat qilgan daromad bo‘yicha yetakchi bo‘lolmadi. “Joker”ning ikkinchi qismini “O‘rgimchak xonim” va “Morbius” kabi muvaffaqiyatsiz filmlarga qiyoslashdi.
“Millerning qizi” (2024)
Jenna Ortega va Martin Frimen ishtirokidagi “Millerning qizi” filmi 1980-yillarda mashhur bo‘lgan psixologik triller janrini qayta tiklashga qaratilgan edi. Kinotanqidchilar “Millerning qizi”ni atirlar reklamasi bilan taqqoslab, filmning intellektual qiymati taxminan bir xil darajada ekanini aytishdi. Ko‘plab tomoshabinlar ham loyihaga salbiy baho bergan.
“Hammasi bizda tugaydi” (2024)
2024-yilning eng shov-shuvli filmlaridan biri kassada muvaffaqiyat qozondi. Ammo ba’zi taqrizchilar film ijodkorlarini romantik klishe va kulgili dialoglardan foydalanilgani uchun tanqid qildi.
“Irlandcha orzu” (2024)
Romkom tanqidchilarning aralash baholarini oldi, ammo shuni ta’kidlash kerakki, ba’zi taqrizchilar o‘z fikrlarini ochiqchasiga, ayamay aytishdi. Masalan, “Irlandcha orzu” maishiy mavzuda bo‘lib, Lindsi Lohan loyihalarni diqqat bilan tanlashi kerak degan e’tirozlar bo‘ldi. Tomoshabinlar ham film yuqori reytingga mos emas, degan fikrga qo‘shildi.
“Megan: Xizmatingizda” (2024)
Tanqidchilardan biri ta’kidlaganidek, bu ilmiy-fantastik film kelajakda kult klassikaga aylanish uchun barcha imkoniyatlarga ega edi. Biroq buning uchun syujetni kamroq bashorat qilinadigan qilish kerak edi. Ammo ijodkorlar boshqa yo‘ldan borishga qaror qilishdi va natijada biz ikkilamchi loyihaga ega bo‘ldik. Chunki “Men robotman” filmi bilan o‘xshashlik yaqqol ko‘zga tashlanadi. Tomoshabinlar ham, shubhasiz, ko‘proq narsa kutgan edi.
“Oilaviy ish” (2024)
Film strimingda sezilarli darajada ko‘rishlar sonini to‘plagan bo‘lsa-da, tanqidchilarning fikrlari turlicha — hattoki ziddiyatli ham. Ba’zilari bosh rollarni ijro etgan Nikol Kidman va Zak Efron o‘rtasida ishonarli munosabat mavjudligini ta’kidlashsa, boshqalari bu fikrga qo‘shilmaydi. Ularning aytishicha, mashhurlar o‘rtasidagi sevgi deyarli sezilmagan. Tomoshabinlarga kelsak, ularning ko‘pchiligi ikkinchi toifadagi tanqidchilar fikriga qo‘shiladi.
Izoh (0)