Sem Mendes The Beatles guruhi a’zolarining har biri haqida 4 ta film suratga oladi

Rejissyor Sem Mendes Sony Pictures Entertainment studiyasi bilan hamkorlikda The Beatles guruhi a’zolari — Pol Makkartni, Jon Lennon, Jorj Harrison va Ringo Starr haqida to‘liq metrajli filmlar suratga oladi. Bu haqda Deadline xabar bermoqda.

Mendes tashkil etgan Neal Street Productions kompaniyasi ham loyihaga prodyuserlik qiladi. Film g‘oyasini rejissyor bir yil avval o‘ylab topgan. Hozircha kinoda qaysi aktyorlar rol o‘ynashi noma’lum. Premyera 2027-yilda bo‘lishi kutilmoqda.

“Barcha davrlar ichida eng buyuk rok guruh haqida film suratga olishdan mamnunman va syujeti yorqin voqealarga boy innovatsion film taqdim etishga tayyorman”, — deydi rejissyor.

Sem Mendes “Amerikacha go‘zallik”(1999), “Skayfoll” (2012) va Jeyms Bond haqidagi “Spektr” (2015) filmlarining muallifidir.