2024 йил ажойиб киноянгиликларга бой бўлди. Аммо премьераси орзиқиб кутилган фильмлар томошабинларнинг ҳафсаласини пир қилди, баъзи лойиҳалар эса умуман жанжалли фильмларга айланди.
“Қарға” (2024)
Афсуски, фильм прокатда омадсизликка учради ва танқидчилардан ниҳоятда салбий баҳолар олди. Айримлар кинони зерикарли ва ўзига хосликдан маҳрум деб аташди, бошқалар эса асосий роль ижрочилари ўртасида ҳеч қандай таъсирчанлик йўқлигини таъкидлашди. 1994 йилда суратга олинган оригинал “Қарға” фильмининг режиссёри фильмнинг ремейкини томоша қилишдан бош тортди ва ижодкорларни фақат пул орттириш иштиёқида айблади. Томошабинлар ҳам норозилик билдиришди.
“Жокер: икки кишилик телбалик” (2024)
Қизиғи шундаки, чиқишидан бир неча ой олдин “Жокер: икки кишилик телбалик” 2024 йилнинг иккинчи ярмидаги энг кутилган фильм сифатида Аstra Midseason Моvie мукофотига сазовор бўлди. Бироқ картина мутахассислар башорат қилган даромад бўйича етакчи бўлолмади. “Жокер”нинг иккинчи қисмини “Ўргимчак хоним” ва “Морбиус” каби муваффақиятсиз фильмларга қиёслашди.
“Миллернинг қизи” (2024)
Женна Ортега ва Мартин Фримен иштирокидаги “Миллернинг қизи” фильми 1980 йилларда машҳур бўлган психологик триллер жанрини қайта тиклашга қаратилган эди. Кинотанқидчилар “Миллернинг қизи”ни атирлар рекламаси билан таққослаб, фильмнинг интеллектуал қиймати тахминан бир хил даражада эканини айтишди. Кўплаб томошабинлар ҳам лойиҳага салбий баҳо берган.
“Ҳаммаси бизда тугайди” (2024)
2024 йилнинг энг шов-шувли фильмларидан бири кассада муваффақият қозонди. Аммо баъзи тақризчилар фильм ижодкорларини романтик клише ва кулгили диалоглардан фойдаланилгани учун танқид қилди.
“Ирландча орзу” (2024)
Ромком танқидчиларнинг аралаш баҳоларини олди, аммо шуни таъкидлаш керакки, баъзи тақризчилар ўз фикрларини очиқчасига, аямай айтишди. Масалан, “Ирландча орзу” маиший мавзуда бўлиб, Линдси Лоҳан лойиҳаларни диққат билан танлаши керак деган эътирозлар бўлди. Томошабинлар ҳам фильм юқори рейтингга мос эмас, деган фикрга қўшилди.
“Меган: Хизматингизда” (2024)
Танқидчилардан бири таъкидлаганидек, бу илмий-фантастик фильм келажакда култ классикага айланиш учун барча имкониятларга эга эди. Бироқ бунинг учун сюжетни камроқ башорат қилинадиган қилиш керак эди. Аммо ижодкорлар бошқа йўлдан боришга қарор қилишди ва натижада биз иккиламчи лойиҳага эга бўлдик. Чунки “Мен роботман” фильми билан ўхшашлик яққол кўзга ташланади. Томошабинлар ҳам, шубҳасиз, кўпроқ нарса кутган эди.
“Оилавий иш” (2024)
Фильм стримингда сезиларли даражада кўришлар сонини тўплаган бўлса-да, танқидчиларнинг фикрлари турлича — ҳаттоки зиддиятли ҳам. Баъзилари бош ролларни ижро этган Николь Кидман ва Зак Эфрон ўртасида ишонарли муносабат мавжудлигини таъкидлашса, бошқалари бу фикрга қўшилмайди. Уларнинг айтишича, машҳурлар ўртасидаги севги деярли сезилмаган. Томошабинларга келсак, уларнинг кўпчилиги иккинчи тоифадаги танқидчилар фикрига қўшилади.
Изоҳ (0)