Ispaniyalik futbolchi Andres Inyesta butsalarini mixga ilganini e’lon qildi.
40 yoshli Andres faoliyati davomida “Barselona”, “Vissel Kobe” va “Emireyts” klublari sharafini himoya qilgan. Faoliyatining asosiy yillarini (2001-yildan 2018-yilgacha) “Barselona”da o‘tkazgan Inyestaning 8 ta eng yaxshi voqeani yodga olamiz.
“La Masiya”
1996-yil sentyabr. Inyesta “Barselona” akademiyasiga qabul qilinadi. “Albasete”dagi o‘yinlari orqali ko‘zga tashlangan yigitcha darhol Kataloniyaga olib ketiladi.
Chempionlar Ligasidagi debyut
2002-yil 29-oktyabr. Andres “Barselona” safidagi debyutini o‘tkazadi. Futbolchining ilk o‘yini Chempionlar Ligasi doirasida “Bryugge”ga qarshi kechadi. Rikelmening goli “ko‘k-anorranglilar”ga muhim g‘alabani olib keladi.
Primeradagi premyera
2002-yil 21-dekabr. Lui van Gal 18 yoshli Inyestani “Malyorka”ga qarshi o‘yinning asosiy tarkibiga qo‘yadi. Ispaniyalik futbolchi yomon o‘yin o‘tkazmadi va jamoasi 4:0 hisobida zafar quchdi.
Terma jamoadagi ilk o‘yin
2006-yil 15-may. Ispaniya termasidagi ilk o‘yinga navbat keldi. Rossiyaga qarshi kechgan o‘yin 0:0 hisobidagi durang bilan yakunlandi.
“Chelsi”ga urilgan muhim gol
2009-yil 6-may. “Barselona” Chempionlar Ligasining yarim finalida “Chelsi”ga qarshi hal qiluvchi o‘yinni o‘tkazgan. O‘yin oxirrog‘ida Inyesta muhim golni urdi va jamoasini finalga olib chiqdi.
2010-yilgi Jahon Chempionati finali
2010-yil 11-iyul. Ispaniya va Niderlandiya mundial finalida o‘zaro to‘qnash keldi. Inyesta qo‘shimcha bo‘limlarda gol urib, jamoasiga chempionlik titulini olib keldi. U golni vafot etgan do‘sti xotirasiga bag‘ishladi va finalning eng yaxshi o‘yinchisi sovrinini qo‘lga kiritdi.
“Oltin to‘p”ga bir qadam
2011-yil 10-yanvar. Mundialdagi muvaffaqiyatdan so‘ng Andres “Oltin to‘p”ga nomzodlar qatoridan joy oldi. Yakunda esa u ikkinchi o‘rinni qo‘lga kiritdi. Sovrin esa klubdagi jamoadoshi Leo Messiga topshirildi.
Yevrotriumf
2012-yil 1-iyul. Jahon Chempionatidagi g‘alabadan 2 yil o‘tib, Ispaniya yana bir sovrinni qo‘lga kiritdi. Kiyevdagi Yevro—2012 finalida ispaniyaliklar Italiyani 4:0 hisobida mag‘lub etdi. O‘yinda hech bir golli vaziyatlarda ishtirok etmagan bo‘lsa-da, yakunda Inyesta finalning eng yaxshi o‘yinchisi bo‘ldi. Shundan so‘ng butun turnirning eng yaxshisi deya ham e’tirof etildi. O‘sha yili Andres UEFA talqiniga ko‘ra Yevropaning eng yaxshi futbolchisi sovrinini qo‘lga kiritdi.
2018-yilda esa Andres qadrdon jamoasi “Barselona”ni tark etib, faoliyatini Yaponiyaning “Vissel Kobe” klubida davom ettirdi. 2023-yilda esa “Emireyts” safiga borib qo‘shilib, u yerdagi 1 yillik faoliyatdan so‘ng butsalarini mixga ilganini e’lon qildi. Shu tariqa yana bir maestro futbol bilan xayrlashdi.
Izoh (0)