Bollivud yulduzi Saif Ali Xonning qizi Sara Ali Xon kino olamidagi debyut ishini 2018-yilda “Kedarnath” filmidan boshlagan. Namoyishdan uch hafta o‘tgach rejissyor Roxit Shettining “Simmba” filmida rol o‘ynagan.
Mazkur filmlar hind kino sanoatida katta muvaffaqiyat qozonganidan so‘ng Sara Ali Xon unchalik e’tiborga loyiq ko‘rilmagan filmlar — “№1 Yuk tashuvchi” (Coolie №1), “G‘ayritabbiy sevgi” (Atrangi Re) hamda “Gazlayting” (Gaslight) kabilarda suratga tushdi va uning karyerasi orqaga keta boshladi.
Endi esa 15-martdan boshlab ketma-ket namoyish etiladigan ikkita film premyerasi Saraning karyerasini cho‘qqilarga olib chiqishi mumkin.
“Tabriklaymiz! Bu — qotillik!” (Murder Mubarak)
Mazkur film detektiv komediya bo‘lib, “Qinidan chiqqan pichoqlar” motivlari asosida suratga olingan. Saif Ali Xon filmda gumonlanuvchi shaxslardan biri rolida ishtirok etadi.
Filmda ko‘plab mashhur hind aktyorlari, jumladan, Karishma Kapur, Sandjay Kapur, Vidjay Varma, Dimpl Kapadiya, Tiska Chopralar rol o‘ynaydi.
Film Netflix tomonidan joriy yilning 15-mart kuni chiqishi rejalashtirilgan.
“Vatanim, jonim vatan” (Ae Watan Mere Watan)
Film vatanparvarlik haqida bo‘lib, ozodlik uchun kurashgan Bombey kolleji talabasining qo‘rqmas sayohati haqida hikoya qiladi. Voqealar 1942-yil avgust oyida bo‘lib o‘tadi. Sara Ali Xon urush davrida radio orqali butun mamlakat bo‘ylab yangiliklarni tarqatishda muhim rol o‘ynagan yosh qiz obrazida ko‘rinish beradi.
Film rejissyori Kannan Ayer bo‘lib, premyera Prime Video’da 21-mart kuni bo‘lib o‘tadi. Mazkur filmlar Sara Ali Xonga ulkan muvaffaqiyat olib kelishi kutilmoqda.
Izoh (0)