18-oktyabr kuni Buyuk Britaniyani poytaxti London shahrida III xalqaro “O‘zbekistonlik” forumi o‘tkazildi. Unda “O‘zbekistonlik” filmining 4-epizodi premyerasi bo‘lib o‘tdi.
Forumda butun dunyodan kelgan 200 dan ziyod o‘zbekistonlik vatandoshlar, O‘zbekistondan tashrif buyurgan delegatlar, shuningdek, Buyuk Britaniyadagi nufuzli shaxslar, biznesmenlar, diplomatlar va jamoat arboblari ishtirok etdi. Tadbirni o‘z kirish nutqi bilan O‘zbekiston Respublikasining Buyuk Britaniyadagi Muvaqqat ishlar vakili Baxtiyor Xodjayev va Yevropa tiklanish va taraqqiyot banki (YeTTB) prezidenti Odil Reno-Basso ochib berdi.
“O‘zbekistonlik” forumlarining maqsadi – butun dunyo bo‘ylab yoyilgan o‘zbekistonliklar o‘rtasida global netvorkingni yo‘lga qo‘yish va O‘zbekistonni intellektual, iste’dodli va mehnatkash insonlar mamlakati sifatida tarannum etish. Uzbekistan’s club ijodiy jamoasi tomonidan tashkil etiladigan xalqaro “O‘zbekistonlik” forumlari avvalroq Berlin (Germaniya) va Parij (Fransiya) shaharlarida muvaffaqiyat bilan bo‘lib o‘tgan edi.
Forumning asosiy voqealaridan biri ayni nomdagi “O‘zbekistonlik” filmning 4-epizodi premyerasi bo‘ldi. Yuz minglab tomoshabinlarning mehrini qozonib ulgurgan badiiy-hujjatli filmlar turkumi o‘z sohasida olamshumul natijalarga erishgan vatandoshlarimizning hikoyalarini so‘zlab berishda davom etmoqda. Yangi, bu safargi epizod qahramonlari Yevropa tiklanish va taraqqiyot banki direktori Kamola Mahmudova va Kembrij universiteti biologi, fan doktori Temur Yunusovlar bo‘ldi. Film YouTube tarmog‘i va MY5 telekanali orqali 19-oktyabr kuni premyera qilindi.
Har ikki qahramon oddiy oiladan chiqqan va tengdoshlariga nisbatan og‘ir bolalikni boshdan kechirgan. Biroq bu ularning o‘zlari orzu qilgan marralardan chekintira olmagani filmda ta’sirchan ochib berilgan.
24 yildan buyon Yevropa tiklanish va taraqqiyot bankida faoliyat ko‘rsatayotgan Kamola Mahmudova tarjimonlikdan qanday qilib bank sohasiga kelib qolgani, bu yo‘ldagi qiyinchiliklar va to‘siqlarni qanday yengib o‘tgani, tomoshabinga katta motivatsiya beradi.
“Men qilolmaydigan hech qanday vazifa yo‘q, men barchasini uddalay olaman. Chegaralar esa faqat miyamizda xolos”, — deya ta’kidlaydi u.
Buxorolik Temur Yunusovning biologiya faniga bo‘lgan qiziqishi va orzulari ota-onasi tomonidan qo‘llab-quvvatlanmagan. Shunday bo‘lsa-da, u o‘z orzulari va maqsadlaridan voz kechmadi.
Har ikki qahramonni bog‘lab turadigan eng muhim jihat — ularning o‘zbekistonlik ekani va o‘z vataniga bo‘lgan muhabbati.
“Men Londonda yashasam ham uning kelajagi haqida o‘ylamayman, uni o‘ylaydiganlar bor. Menga O‘zbekistonning kelajagi muhim. U yerda ota-onam, yaqinlarim yashaydi. Qo‘limdan kelsa, nega yordam bermasligim kerak?”, — deydi Temur.
“Skver”dagi daraxtlar kesib tashlangan kun hayotimdagi eng qora kunlardan biri, — deydi Kamola Mahmudova. — Xuddi meni mashina urib ketgandek bo‘lganman. Axir daraxtlar bolalarimizning mulki. Unga tegishga haqqimiz yo‘q. Har bitta kesilgan daraxt — bolalarimizning sog‘lig‘ining bir parchasi ketdi, degani”.
Filmda, shuningdek, qahramonlarning ekologik muammolar, tabiat, iqlim o‘zgarishlari va boshqa masalalarga oid fikrlari bilan tanishasiz.
“Biz global dunyoda yashayapmiz. Bu begonaning muammosi degan tushuncha qolmadi, degani. Xitoydan chiqqan virus bizni o‘ldiradi, Amerikadan chiqayotgan zaharli tutunlar bizni kuydiradi. Ya’ni muammo — hammamizniki. Bunday muammolar faqat O‘zbekiston yoki qaysidir mamlakatda emas, butun dunyoda seziladi. O‘zbekistondan boshqa davlatga qochib, bu muammodan qutula olmaysiz.
Keling, o‘z uyimizni saranjom qilaylik. Iqlim o‘zgarishi muammolariga qarshi kurashish uchun har bir odam kamroq iste’mol qilishi lozim. Masalan, sizga ikkita ko‘ylak kerak bo‘lsa, o‘nta olmang, yarmini oling. Bu yarmiga ketadigan paxta va bu paxtaga ketadigan suv tejaldi, degani. Biror manzilga mashinada emas, metroda boring. Shunda sizdan qoladigan karbonat angidrid kamayadi. Hammasi shundan kelib chiqadi. Har bitta tanlovning qiymati bor. Uning qiymatini bolalarimiz to‘laydi. Ularga o‘z qarzingizni qoldirmoqchimisiz?”, — deydi Temur Yunusov.
Izoh (0)