Aktrisa Emili Blant Page Six nashriga bergan intervyusida qizlarining “Qattiqqo‘l xonim” filmiga munosabati haqida so‘zlab berdi. Aktrisaning farzandlari mashhur filmni tomosha qilgach, onasi gavdalantirgan qahramonni “dunyodagi eng yomon odam” deb atagan.
O‘n yoshli Heyzel va yetti yoshli Vayolet ismli qizlar Blantning ijrosidan shunchalik ta’sirlanganki, ular onasini (aniqrog‘i, filmdagi qahramonni) “hayotida uchratgan eng yomon odam” deb atagan.
Podium nomli moda jurnali bosh muharriri Miranda Pristlining (aktrisa Meril Strip) yordamchisi obrazi Emili Blant karyerasidagi birinchi katta roli edi. Aktrisaning aytishicha, uning qahramoni odamlar qalbida shunchalik katta taassurot qoldirishini tasavvur ham qila olmagan:
“Filmdagi obrazimdan menga qarab iqtibos keltiradigan insonlarni haligacha uchrataman”, dedi aktrisa.
Shuningdek, Emili Blant mashhur aktrisalar — Meril Strip va Enn Heteuey kabi yulduzlar bilan birgalikda ishlagandan mamnun ekani hamda film suratga olish maydonida ular bilan ajoyib vaqt o‘tkazganini qo‘shimcha qildi:
“O‘shanda men yosh edim, bu mening ishtirokimdagi birinchi katta film edi. Yodimda, agentim menga qo‘ng‘iroq qilib, dam olish kunlari premyera bo‘lib o‘tishi haqida xabar bergan edi. Ichimda bu yaxshimi, deb o‘ylagan edim. Xuddi bu hodisa ajoyib ekanligini bilmagandek”, deya eslaydi Blant.
Loren Vaysbergerning “Prada kiygan iblis” nomli kitobi asosida rejissyor Devid Frenkel tomonidan suratga olingan “Qattiqqo‘l xonim” filmi 2006-yilda ekran yuzini ko‘rgan. Loyiha Meril Stripga komediya janridagi eng yaxshi aktrisa roli uchun “Oltin globus” mukofotini va bosh rol uchun “Eng yaxshi aktrisa” nominatsiyada “Oskar” mukofotini olib kelgan. 35 million dollarlik byudjet bilan film 326 million dollar daromad keltirgan.
Yaqinda Disney kompaniyasi “Qattiqqo‘l xonim” filmining davomini suratga olishi ma’lum bo‘ldi. Filmda qat’iy va talabchan rahbar, bosh muharrir Miranda Pristli rolini o‘ynagan aktrisa Meril Strip va moda jurnali xodimi obrazini gavdalantirgan Emili Blant o‘z rollariga qaytishi mumkin. Aktrisalar hozircha suratga olish shartnomasini imzolamagan. Loyiha esa ishlab chiqarishning dastlabki bosqichida. Filmning davomi bo‘yicha muzokaralar rejissyor Devid Frenkel hamda ssenariy muallifi Alin Brosh Makkenna tomonidan olib borilmoqda.
Izoh (0)