18-19-sentyabr kunlari xonanda Dilnoz Hakimova ilk yakkaxon konsert dasturini muxlislar e’tiboriga havola qiladi. U 6 yillik ijodi davomidagi eng sara qo‘shiqlari qatorida rang-barang duetlar ham va’da qilgan.
— Konsertda, albatta, rang-baranglik muhim. Yangi duetlar bo‘ladimi, bo‘lsa kimlar bilan?
— O‘zim sevgan xonanda Shohruxxon bilan yangi duetni konsertda premyera qilamiz. Ko‘pchilikning ko‘nglidan joy olgan, Konsta bilan birgalikda kuylagan “U haqida” qo‘shig‘imizni, Mirjalol Ne’matov bilan ham yangi duet tayyorlab qo‘yganmiz. Ilk yakkaxon konsertim bo‘lgani uchun juda hayajonlanyapman, yashirib nima qilaman (kulib). Kechalari uyqu yo‘q, konsert yaxshi o‘tishi uchun qattiq harakatdamiz.
— Konsertga necha oy davomida tayyorgarlik ko‘rib kelyapsiz?
— Juda tez bo‘lib ketdi, bir yarim oy ichida tayyorgarlik ko‘rildi. To‘g‘ri, bu qisqa muddat, lekin jamoamiz ahil, hamma qo‘lidan kelgan yordamini ayamayapti. Xudoga shukr, chiptalar ham sotilgan.
— Dasturda avval repertuaringizda bo‘lmagan qaysi yangi mavzularda qo‘shiqlar tinglashimiz mumkin?
— Konsertda 24 ta taronam yangraydi, albatta, premyeralar ham bo‘ladi. Konsert qanday premyerasiz bo‘lishi mumkin? Yangi mavzularga kelsak, ko‘pchilik faqat sevgi haqida bo‘ladi, deb o‘ylaydi. Yo‘q, jiddiy mavzularda ham kuylayman. O‘z farzandini sotib yuborgan va bola asrab olgan onalar nolalari aks etgan “Alla” nomli qo‘shig‘im bor. Koverlar ham bo‘ladi, konsert oxirida raqslar bilan “bomba” chiqish tayyorlab qo‘yganmiz.
— Hozir san’atkorlar orasida odat tusiga aylanyapti: kimdir muxlislarini sahnaga chiqarib, qo‘shiq ayttirib gitara sovg‘a qiladi, boshqa birov o‘zining kostyumini beradi. Sizda-chi, muxlislaringiz uchun shunga o‘xshash syurprizlar yoki shoular bo‘ladimi?
— Men o‘zim muxlislar uchun sovg‘aman, deb o‘ylabman (kulib). Chunki ular bilan ko‘rishishni anchadan beri niyat qilganman, ular ham men bilan birgalikda qo‘shiq kuylashni yaxshi ko‘radi. Rostini aytsam, bunday sovg‘a tayyorlash xayolimga kelmabdi, endi o‘ylanib qoldim.
Hamma qo‘shig‘imni sevib ijro qilaman. Bilsangiz, o‘zi yilda bir qo‘shiq chiqaraman. “Daydi”ni chiqarib bir yil uxlayman. “Saharlarda”ni chiqarib yana dam olaman. Orada “U haqida” aytib ketaman (kulib). Har bir taronam chiqishining o‘zi oson emas, shu sababli hammasini sevib kuylayman, menda “majburiy” qo‘shiqlar yo‘q.
— Tug‘ilgan kuningizda Instagram sahifangangizga uzuk rasmini joyladingiz. Shaxsiy hayotingizda nima yangiliklar? Xalq taniydimi u insonni?
— Yaxshi yangiliklar bor, u kishi san’atkor emas. Rasm joylaganimda sochi va qoshi ozroq ko‘rinib qolgan ekan, kommentariyada odamlar “Men taniyman bu odamni, falonchi san’atkor bu”, “Yo‘q, u emas, roliklarda chiqadigan mana bu aktyor” deyishyapti. Eng qizig‘i, ular aytayotgan odamlarni o‘zim ham tanimayman. Indamay qo‘yaqoldim.
— Kutilmagan taklif bo‘ldimi bu?
— Mening hayotimda juda ko‘p narsa kutilgan…
— Jonli ijroda konsert berish fikri bo‘lmadimi?
— Albatta, jonli ijroda bermoqchi edim, nasib qilsa, kelgusi yillar beraman. Endi katta qiz bo‘lib qoldim, oila mavzusida ham maqsadlar qo‘yish kerak. Kelin ko‘ylakda ham intervyu beraman (kulib).
Izoh (0)