Mashhur bokschi yigit ko‘chada to‘lg‘og‘i tutgan ayolga yordam berish uchun uni tug‘uruqxonaga olib boradi. Ammo shu kundan e’tiboran uning hayoti butunlay o‘zgarib ketadi. Chunki ayol farzandini bokschi yigitga tashlab ketadi. To‘yi bo‘lish arafasidagi yigit gap-so‘zlardan qo‘rqib, chaqaloq haqida yaqinlariga aytmadi. Ammo uni tashlab ketishga ham ko‘zi qiymaydi.Bu voqealar sizga “Dada” filmini eslatdi, to‘g‘rimi? Bu yil mazkur kartina suratga olinganiga 12 yil to‘ldi. Film 2010-yilning iyul oyida ilk marta premyera qilingan edi. Shu munosabat bilan “Daryo” muxbiri Nargizaxon Murodova film ijodkorlari bilan bog‘lanib, “Dada”ning suratga olinishi bilan bog‘liq qiziqarli voqealar haqida suhbatlashdi.
“Dada” filmida Ulug‘bek Qodirov, Muhabbat Ergasheva, Matyoqub Matchonov, Nodira Qodirova, Nigora Karimboyeva, Ahror Mahmudov, Abdirayim Abduvahobov, Aziza Bekmatova, O‘tkir Meliyev, Zuhra Soliyeva kabi iste’dodli aktyorlar jamoasi suratga tushgan.
Abduvohid G‘aniyev — film rejissori
— “Panoh” filmining suratga olish vaqtida talabalar yotoqxonasida uzoq yillardan buyon ishlaydigan qorovul bilan suhbatlashib qolganman. U talaba qizlarning biri to‘y ko‘rmay, homilador bo‘lgani va farzandini tashlab ketgani haqida aytib qoldi. Bundan mazmundagi filmlar avval ham yaratilgani uchun boshqacharoq tarzda film olgim keldi. Ya’ni tashlab ketilgan bolaning taqdiri qanday bo‘ladi, degan savolga javob bermoqchi bo‘ldim. Shoira G‘iyosova va Akrom Mahkamovlar bilan maslahatlashib, ssenariy yozganmiz.
Zafar roli uchun ko‘p nomzodlar bo‘lgan. Avvaliga Ulug‘bek Qodirovni olishga ikkilanib turganmiz. Chunki Zafar bokschi yigit bo‘lishi, ringdagi xatti-harakatlari ko‘rsatilishi kerak edi. Ammo u vaqtda Ulug‘bek yaxshigina vazn to‘plagandi. Tan berish kerak, Ulug‘bek 15 kunda ozib, sport formasiga kirgan.Suratga olish maydonchasida qiyinchiliklar juda ko‘p bo‘lgan. Chunki 6 oylik chaqaloq bilan ishlash oson emas. Olti oylik bolakay injiqlanishi, kutilmaganda uxlab qolishi yoki tinmay yig‘lashi mumkin. Ulug‘bek Qodirov u vaqtda hali farzandli bo‘lmagandi. Chaqaloqni cho‘miltirish, tagligini almashtirish bilan bog‘liq kadrlarda rosa qiynalgandi, — deydi film rejissori Abduvohid G‘aniyev.
Rejissor “Dada” filmida kichkina Zafar rolini ijro etgan Behruz G‘ulomovning bugungi hayoti va qiziqishlari qanday ekanligini bilishni istashishi aytdi.
— Aniq esimda, u bola film suratga olingan vaqtda olti oy edi. Oradan ancha yil o‘tib, qaysidir filmning premyerasida “O‘zbekkino”ning sobiq rahbari A’zam Isoqov uni sahnada tanishtirgandi. U 5 yoshni qarshilab, shiringina bolakay bo‘lgandi. “Dada” filmini ko‘rganda shu bolakayning bugungi hayoti, qiziqishlari qanday ekan deb o‘ylayman. U biz bilan bog‘liq voqealarni eslolmasligi tabiiy hol. Ammo u bilan bizning shirin xotiralarimiz bor, — deydi rejissor.
Bu rejissor bir necha yildan buyon AQSHda istiqomat qilyapti. Ijodkor buning sababini quyidagicha izohladi.
— Ayrimlar o‘ylagandek, O‘zbekistondan yoki ijoddan ketganim yo‘q. Katta qizim AQSHdagi universitetda o‘qiydi. Shu bois oilam bilan AQSHga ko‘chib kelganmiz. Ammo vaqti-vaqti bilan O‘zbekistonga borib, filmlar suratga olyapmiz. O‘tgan yili borganimda ham qoraqalpoq ijodkorlari bilan hujjatli film suratga oldim. Okean ortida ham ijod bilan bandman. Reklama roliklari suratga olamiz. Hozirgi kunda esa Gollivud prodyuserlari bilan hamkorlikni yo‘lga qo‘ymoqchiman. AQSHda o‘zimni xuddi talabadek his qilaman, chunki bu yerga kelib juda ko‘p narsalarni o‘rgandim, — deydi rejissor Abduvohid G‘aniyev.
Ahror Mahmudov — aktyor:
— “Dada” filmi bilan bog‘liq qiziqarli voqealar juda ko‘p. Masalan, Zafar kelinbola bilan to‘y ko‘ylagini ko‘rgani ko‘rgani borganida mening qahramonim chaqaloq bilan mashinada o‘tirib turadi. O‘sha paytda havo bugungidek juda issiq edi. Qo‘limdagi bola yig‘layverib, qizarib ketgandi. Uni ovutolmay qiynalib ketganmiz. Bolakayning onasi ham qiynalib ketgan. “Stop” deyilishi bilan yugurib kelib, bolani qo‘limizdan olardi, — deydi aktyor Ahror Mahmudov.
Muhabbat Ergasheva — aktrisa:
— Bu filmga Abduvohid G‘aniyevning ustozi Rustam Sa’diyev taklif etgandi. Kasting topshirgach, rolga tasdiqlashgan. Suratga olish maydonchasida juda ko‘p qiziqarli voqealar bo‘lgan. Masalan, Ulug‘bek akani it quvlagan sahnasi olinayotganda o‘rgatilgan it haqiqatan ham uni quvib ketgan. Aktyorga tan-jarohatini yetkazmasin deb, itning ortidan yana 3-4 kishi yugurishgan. Keyin Ulug‘bek Qodirov bilan kechasi tomga chiqib, shahar manzarasini tomosha qiladigan sahnamiz bor. Ulug‘bek aka tasodifan oyog‘imni bosib olgan. U kishining qanchalik gavdali ekanligini yaxshi bilasiz? Oyog‘im og‘rib, bir haftagacha cho‘loqlanib yurganman, — deydi aktrisa Muhabbat Ergasheva.
“Dada” filmini ko‘rgan kishida kichkina Zafar qanday yigit bo‘lgan ekan, degan savol tug‘ilishi tabiiy hol. Chunki o‘zbek kinosida chaqaloq bosh rolni ijro etgan filmlar juda kam. Shu bois Behruz G‘ulomov va uning oila a’zolarini izlashga qaror qildik.
Mana bu uyni tanidingizmi? Bu yerda “Dada” filmi suratga olingan. To‘g‘ri, 12 yil davomida u biroz o‘zgargan. Ammo aktyor Ulug‘bek Qodirovning qahramoni yashagan bolaxona saqlab qolingan.
— Film ijodkorlariga uyimiz ma’qul kelgan. Ungacha ko‘pchilik oilalar oylik chaqaloqlarini filmda suratga tushishiga rozi bo‘lishmagan ekan. Bizdan so‘rashganida qarshi bo‘lmadik. Adashmasam, suratga olish jarayonlari taxminan bir oy davom etgandi. O‘g‘lim vazmin bo‘lgani uchun ijodkorlarni deyarli qiynamagan. Qorni to‘q, uyqusi yaxshi bo‘lgan bo‘lsa, kadrga kulib suratga tushib berardi.
O‘g‘lim Behruz G‘ulomov poytaxtdagi 94-maktabda tahsil oladi. Futbolni juda yaxshi ko‘radi. Aktyorlikka qiziqmaydi, ammo o‘zi suratga tushgan “Dada” filmini ko‘p marta tomosha qilgan. “Shunaqa bo‘lganmanmi?” deb savollarni qalashtirib tashlaydi. Tarixda qoladigan film yaratilgan, unga o‘z hissamizni qo‘shganimizdan juda xursandmiz, — deydi Behruz G‘ulomovning onasi Kamola G‘ulomova.
Behruz G‘ulomovdan san’atga qiziqishi va do‘stlari u suratga tushgan film haqida qanday fikrda ekanligi haqida so‘radik.
— Ko‘pchilik kinoda suratga tushganimni bilishadi. Ammo men bu haqida gapirishga uyalaman. Ammo kinoni juda maqtashadi. Aktyorlikka emas, futbolga qiziqaman. Yaqinda ham qo‘limdan jarohat oldim. Ammo baribir futbol eng qiziqarli sport turi, — deydi Behruz G‘ulomov.
Mavzuga doir:
- “Opa-singillar” 10 yoshda: serial qanday suratga olingan? Bosh qahramonlar hozir qanday ko‘rinishda va nima bilan band?
- Bir filmda ikkita qahramonni mahorat bilan ijro etgan o‘zbekistonlik aktyor va aktrisalar (video)
- Foto: 90-yillarda mashhur bo‘lgan “Yolg‘on asirasi” seriali qahramonlari 22 yildan keyin
- “Sardor” seriali qahramonlari 21 yildan so‘ng qanchalar o‘zgargan va ular qanday ishlar bilan band (foto va video)
Izoh (0)