Filmni suratga olish murakkab jarayon bo‘lib, loyihaning qanchalik muvaffaqiyatli bo‘lishi ko‘plab omillarga, jumladan, aktyorlar tarkibi, rejissyor mahorati, ssenariy, marketing kampaniyasi va hatto tanqidchilarning fikrlariga bog‘liq.
Ushbu omillarga tayangan holda filmning kelajakdagi taqdirini yuqori aniqlik bilan bashorat qilish mumkindek tuyuladi, ammo kino sanoati kutilmagan hodisalarga boy. Shov-shuvli reklamalar va katta byudjetga ega ba’zi kartinalar juda kam insonlarni jalb etishi, yoki aksincha, muvaffaqiyatiga ishonch bildirilmagan loyihalar eng kassabop filmlarga aylanishi mumkin.
“Yulduzlar jangi: IV epizod: yangi umid”
Bugungi kunda “Yulduzlar jangi” tarixidagi eng yuqori daromad keltiruvchi media franshizalar ro‘yxatida turibdi. Ammo 1977-yilda barcha ijodkorlar Jorj Lukasning ijod mahsuli omadli bo‘lishiga shubha bilan qaragan edi.
20th Century Fox kompaniyasi “Yulduzlar jangi” filmining premyerasi uchun bor-yo‘g‘i 40 ta kinoteatrni bron qilgan, chunki oddiy tomoshabinga olisdagi galaktika muammolarini tomosha qilish qiziq bo‘lmaydi, deb hisoblagan.
Hatto rejissyor Jorj Lukas ham uning muvaffaqiyatiga ishonmasdi. Natijada “Yangi umid” 20th Century Fox’ni bankrotlikdan qutqarib qoldi, film o‘sha paytda aql bovar qilmaydigan 337 million dollar daromadga chiqdi va tarixdagi eng yaxshi franshizalaridan biri sifatida qoldi.
“Titanik”
Bir vaqtlar “Titanik” filmining muvaffaqiyatsizlikka uchrashini deyarli har bir kino tanqidchilari bashorat qilgan edi. Chunki filmni suratga olish ishlari uchun xarajatlar miqdori tobora oshib borar, premyera sanasi esa bir necha marta kechiktirilgan edi.
O‘sha davrda “Titanik”ning byudjeti aql bovar qilmaydigan darajada — 200 million dollardan ortiq edi, bu esa haqiqiy Titanik kemasini qurish narxidan ham ko‘proq edi. Keyinchalik filmning taqdiri barchamizga ma’lum: “Titanik” ikki milliarddan ortiq kassa tushumlarini olib keldi, 15 hafta davomida kino kassalarida yetakchilikni qo‘ldan boy bermadi, 11 marta “Oskar” mukofotining turli nominatsiyalarida nomzod bo‘ldi va kino tarixidagi eng yorqin filmlardan biri bo‘lib qoldi.
“Avatar”
“Titanik” filmining ajoyib muvaffaqiyatidan so‘ng rejissyor Jeyms Kemeron yana bir yuqori darajadagi loyiha bilan katta ekranga qaytish uchun 12 yillik tanaffus oldi. “Avatar” filmi ekranlarga chiqishidan avval ham ko‘plab tanqidlarga uchradi: film byudjetining tobora oshib borishi, tanqidchilarning noroziliklari premyeraga qadar davom etdi. Bu safar Kemeron aniq qoqiladi va “Avatar” muvaffaqiyatli bo‘lmaydi, degan fikrlar baland ovozda ta’kidlanar edi. Begona sayyorada noodatiy ko‘l tusli odamlar va mavjudotlar haqidagi uch soatlik hikoya kimga ham qiziq bo‘lishi mumkin?
Natijada esa “Avatar” jahon prokatida ikki yarim milliard dollardan ko‘proq daromad olib keldi va Marvel olamining “Final” filmigacha eng yuqori daromad keltiruvchi film nomini saqlab qoldi.
“Ibtido”
2008-yilda Kristofer Nolan barcha davrlarning eng afsonaviy komiks filmlaridan birini yaratdi. “Qora ritsar”dan keyin u taniqli rejissyorga aylandi. Ammo Nolan Leonardo Di Kaprio ishtirokidagi “Ibtido” filmini suratga olishni boshlaganida prodyuserlar uning g‘oyasidan jiddiy tashvishlana boshlashdi.
Ong ostiga sayohatlar haqidagi fantastik drama tomoshabinlarga manzur bo‘lmasligiga tanqidchilar ishonar edi. Fantastik asarlar yozuvchisi Jeyson Senford ham filmning muvaffaqiyatsiz bo‘lishini hamda Nolanning rejissyorlik karyerasi barbod bo‘lishini bashorat qilgan edi. Ammo barchasi yaxshilik bilan yakunlandi. “Ibtido” filmi nafaqat 825 million dollar yig‘di, balki sakkiz karra “Oskar” mukofotiga nomzod bo‘lib, to‘rtta oltin haykalchani qo‘lga kiritdi.
Izoh (0)