O‘zbekistonlik aksariyat odamlar, deylik o‘rta qatlam vakillarining ayni kundagi asosiy orzularidan biri nima? Siz ham yangi mashina sotib olish va uy xarid qilish desangiz ajab emas. Inson tabiati shundayki, unga orzulari haqida gapirsangiz, orzulariga tez va oson yetishish imkoni borligini aytsangiz, uning uchun sizdan-da yaxshi suhbatdosh yo‘q. Shu sabab ham uni tez va oson o‘zingizga ergashtirasiz. O‘zbekistonliklarning eng nozik nuqtasi ham shu. Aynan shuning uchun ham bugun O‘zbekistonda avtomobil va uy sotib olish bilan bog‘liq firibgarliklar urchigan. Har kuni hech bo‘lmaganda bir marta mana shunday xabarlarga ko‘zingiz tushadi. “Daryo”ga kelib tushgan navbatdagi murojaatlar ham aynan shu muammo bilan bog‘liq bo‘ldi.
Toshkent viloyatining Bo‘stonliq tumanida yashovchi Ma’rifat O‘ratova Toshkent shahrining Sergeli tumanidagi avtosalonlarning biridan mashina xarid qilish uchun 83 million so‘mdan ortiq mablag‘ to‘laganini, biroq ayni kunga kelib aldanib qolganini aytmoqda.
2023-yilning 26-sentyabr kuni Sergeli tumanidagi “Avtoboom 007” avtosalonidan oq Gentra sotib olish uchun 83 million 243 ming so‘m to‘ladik. Shartnomaga ko‘ra, mashinamiz 2024-yilning 26-fevral kuni bizga topshirilishi kerak edi. Lekin ayni kunda ham mashinadan darak yo‘q, deydi avtomobil xarid qilish uchun avtosalonga pul to‘lagan fuqaro.
Murojaatchilarga ko‘ra, ular aldanib qolayotganini bilgach, 2024-yilning o‘tgan davri mobaynida ko‘plab tashkilotlarga, jumladan, ichki ishlar organlariga ham murojaat qilgan. Shuningdek, Sergeli tuman prokuraturasiga ham shikoyat qilgan. Ammo natija chiqmagan.
Toshkent shahridagi yana bir holat o‘zbekistonliklarning orzu-havas ortidan quvib, katta mablag‘ga chuv tushganlari haqida. “Daryo”ga murojaat qilgan fuqaroga ko‘ra, ular yangi avtomobil xarid qilish orzusida Toshkent shahrining Yashnobod tumanidagi Allianse Motors MCHJga milliardlab pul to‘lab, ayni kunda aldanib qolgan. Ularning hisob-kitobiga ko‘ra, avtomobillar uchun to‘langan pullar 100 milliard so‘mdan oshadi.
Maxtumquli ko‘chasidagi Allianse Motors avtosaloni firiblariga uchganlardanmiz. Ularga mashina uchun pul to‘lab, avtokreditlar qilingan. Shu bo‘yicha Yashnobod tuman prokuraturasiga murojaat qilganmiz. Ariza berganmiz, ular chora ko‘ramiz deyishgan lekin chora ko‘rishmagan. Undan keyin shahar prokuraturasiga o‘tgan. Hozir Bosh prokuraturaga kelib turibmiz. Sarson bo‘lyapmiz. Faqat va’da berishmoqda. Natija yo‘q, deydi avtomobil xarid qilish maqsadida avtosalonga pul to‘lab kuyib qolgan yana bir murojaatchi.
Murojaatchining bildirishicha, ular avtomobil uchun to‘lovni bank orqali amalga oshirgan. Faqat avtosalon hisob raqamiga uning nomidan to‘lanmagan.
O‘sha paytda menda gumon paydo bo‘lgandi. Nega bunaqa desam, 5 foizlik komissiyadan yutasiz deyishgandi. Qolaversa, men ulardan avval ham avtokredit olganim uchun ishonganman, deydi Ulug‘bek Turmatov.
Murojaatchi fuqaroning hisob-kitobiga ko‘ra, U BYD rusumli avtomobil uchun 111 million so‘m boshlang‘ich to‘lov, 11 milliondan ortiq summani sug‘urta uchun va yana uch oylik kredit to‘lovi uchun 25 million so‘m to‘lagan.
Men boshlang‘ich to‘lovni shu yilning fevral oyida salon direktori Davlatbek Narziyev, yana Sobir ismli rahbarga to‘laganman. Undan keyin boshqa direktor qo‘yishdi. So‘ngra Shahzoda Narziyeva degan opasi bizga ro‘baro‘ kelib, pullaringni qilib beramiz deb aldab kelishdi. Menga o‘xshagan aldanganlar juda ham ko‘p. Hozir na mashinasini olishdi, na pulini, deydi murojaatchi.
Sanjarbek Abdurahmonov ismli murojaatchi ushbu avtosalonga BYD Champion rusumli avtomobil uchun avtosalonning Suhrob Sultonov ismli xodimiga 26 ming 500 dollar to‘lagan.
2024-yilning iyul oyida BYD Champion’ga 26 ming 500 dollar pul to‘laganman. Mashinani 4 kunda olib kelib beraman degandi. To‘rt kundan keyin kelsam pul ham, mashina ham yo‘q. Nima qilsangiz qiling, o‘ldirib yuboring deb turib olgan. Ular 15 kishi bo‘lib, shahar o‘rtasida hammadan qo‘rqmay pul yig‘gan. Ko‘pchiligi ko‘chada yuribdi. Shaxsan mendan pul olgan Suhrob Sultonov ko‘chada yuribdi. Shahzodaning ukasi Davlatbek ham ko‘chada maza qilib yuribdi. Shahzoda hamma aybni o‘zim qilganman deya, barcha sheriklarini chiqarib yubormoqchi bo‘lyapti. Sababi bu yerda 15 nafar odam bo‘lsa boshqa, bitta odam bo‘lsa boshqa vaziyat bo‘ladi. Bular buni biladi. Qolaversa, aybni bo‘yniga olayotgan Shahzoda homilador. Yonidagi bolalar ham biz bilmaganmiz deb suvdan quruq chiqishga urinyapti. Aslida ular bizga hech qanday mashina qilib berilmasligini bilgan. Bilsa-da, pul yig‘gan, deydi Sanjarbek Abdurahmonov.
“Daryo” jurnalisti bilan suhbatlashgan yana bir murojaatchining aytishicha, u ham yangi avtomobil sotib olish uchun Allianse Motors avtosaloniga salkam 30 ming dollar to‘lagan. Ammo ayni kunga kelib, na pul bor, na mashina.
Murojaatchilarning OAV vakillariga bildirishicha, Allianse Motors avtosaloniga avtomobil uchun pul to‘lab aldanganlar 120 nafarga borgan. Ular to‘lagan pul miqdori esa 100 milliard so‘mni tashkil qilmoqda.
Toshkent shahridagi Allianse Motors MCHJ mas’ullariga nisbatan 2024-yilning iyul oyida jinoyat ishi qo‘zg‘atilgandi. O‘shanda avtosalon mansabdori mashina olib kelib berish haqida yolg‘on va’dalar berib, fuqarolarning 6 milliard so‘mdan ortiq pulini o‘z ehtiyojlariga sarflab yuborgani ma’lum qilingandi. Avtosalon mas’ullariga nisbatan Jinoyat kodeksining 168-moddasi (firibgarlik) va boshqa modda bilan jinoyat ishi qo‘zg‘atilgan. Jamiyat mansabdor shaxslari 19 nafar fuqaroga avtomashina olib kelib berish haqida yolg‘on va’dalar berib, 6 milliard 169 million so‘m to‘lov pulini o‘zlarining ehtiyojlari uchun sarflab yuborishgani aniqlangan. “Kun.uz” nashrining yozishicha, 2021-yil dekabr oyida davlat ro‘yxatidan o‘tkazilgan Allianse Motors MCHJ Davlatbek Narziyevga tegishli.
Izoh (0)