Jinoyat ishlari bo‘yicha Olmazor tuman sudida odamlarni aldab, 50 million so‘mga hovli, 25 million so‘mga ko‘p qavatli uylardan xonadon va 5,5 million so‘mga yangi avtomobil olib berishni va’da qilib, ularni chuv tushirgan guruh ishi ko‘rib chiqilmoqda. Bu haqda sudda qatnashgan “Daryo” muxbiri xabar berdi.
Sudda aniqlashtirilishicha, 2024-yilning yanvar—fevral oylarida faoliyatiga chek qo‘yilgan jinoiy guruhning 3 nafar a’zosi bugun sudning qora kursisida o‘tirib, savollarga javob bermoqda.
“Daryo” manbasining ma’lumot berishicha, jinoiy guruh 361 nafar fuqaroning 6 milliard 734 million so‘m pulini o‘zlashtirgan.
Instagram’dagi reklamani ko‘rib, ularga ishonib, uy olish maqsadida ularning ofisiga borgandim. 25 million so‘m to‘lab, aldanib qoldim, — deydi dom olish niyatida jinoiy guruh a’zolariga pul bergan jabrlanuvchi.
Yana bir jabrlanuvchining aytishicha, saxiy tadbirkorlar qiyofasiga kirgan jinoiy guruhning Instagram orqali sizdirilgan reklamalarida 19 million so‘mdan ortiq mablag‘ evaziga 60 kunda yangi avtomobil olib berishni va’da qilingan. Biroq, va’da bajarilmagan.
60 kunda salondan yangi mashina olib beramiz deyishgan. Guruhning Olmazor city’dagi ofisiga borib, Shirin ismli qizga 19 milliondan ortiq pul to‘ladim. Aytilgan vaqtda va’da bajarilmadi. Borsam, bozorga borib mashina ko‘ramiz deyishdi. U yerga borsam men bilan borgan ishchilar yo‘qolib qolishdi. Shu bo‘yi ularning uch-to‘rt kun ko‘rmadim. Ko‘p o‘tmay, guruh ofisi muhrlanib, faoliyati to‘xtatildi, pulimga kuyib qoldim, — deydi yana bir jabrlanuvchi.
20 million so‘mga chuv tushgan yana bir sudlanuvchi ayolning aytishicha, u farzandiga to‘y qilish niyatida guruh ofisiga 50 million so‘m foizsiz kredit olish niyatida borgan. Biroq, guruh a’zolarining 20 million so‘mlik dastlabki badal to‘lovi borligi va bu pul garov evaziga vaqtincha ushlab turilishi haqidagi ertaklariga aldanib, pul olish maqsadida borgan bo‘lishiga qaramay, guruh kassasiga 20 million so‘m pul to‘lab qaytgan. Va bu pullariga kuygan.
Bugun sudda so‘ralgan jabrlanuvchilarning barchasi ularga yetkazilgan zarar qoplanishini talab qilmoqda.
Sud majlisida aytilishicha, jinoiy guruh a’zolari orasida “Avto 60 oy” ishi bo‘yicha odamlarni chuv tushirib, 2 yilu 10 oy qamoqda o‘tirib chiqqan Jamshid Bahodirov ham bor.
U jabrlanuvchilarga yuzlanib, ularga nisbatan qo‘llanilgan qamoq ehtiyot chorasini o‘zgartirish va ularning ochiqqa chiqishi odamlarning pullarini to‘lab berishi uchun imkoniyat bo‘lishini aytib, “Ko‘chada pul bergan odamlarimizdan oladigan mablag‘imiz 419 ming dollarni tashkil qiladi. Bizga qo‘yilgan ayblovda yetkazilgan zarar 6 milliard 300 millionga yaqinligi aytilmoqda. Biz ochiqqa chiqsak, da’voyimiz yo‘q deb yozib bersangiz, biz shu pullarimizni olib sizga to‘laymiz”, — dedi. Jabrlanuvchilar esa bu navbatdagi ertak ekanini aytdi. Va uning taklifini rad qildi.
“Avto 60 oy” ishi
“Avto 60 oy” MCHJning mansabdor shaxslari va boshqalarga nisbatan 2019-yil 12-oktabr kuni Jinoyat kodeksining 188-1-moddasi 1-qismi (pul mablag‘larini va (yoki) boshqa mol-mulkni jalb etishga doir noqonuniy faoliyat) bilan jinoyat ishi qo‘zg‘atilgan edi.
Tergov jarayonida J. Bahodirov o‘zining jinoiy sheriklari bilan oldindan til biriktirib, bir guruh bo‘lib, “Avto oltmish oy” va Catalea Media MCHJ va YTT “J.Baxodirov”ni tashkil etib, 3 oy muddat ichida O‘zbekistonda UzAuto Motors AJ tomonidan ishlab chiqarilgan avtomashinalarni yetkazib berishni va’da qilib, avtomashina rusumiga qarab, 1 million so‘mdan 10 million so‘mgacha bo‘lgan miqdorda pul olib, mablag‘larni qo‘lga kiritgani aniqlangan.
Jinoyat ishi bo‘yicha “Avto 60 oy” MCHJ bosh ofisidan olingan buxgalteriya hujjatlaridagi ma’lumotlar bo‘yicha 19 344 dan ortiq shaxslar bilan shartnomalar tuzgani aniqlangan va ushbu shartnomalar jinoyat ishiga qo‘shilgan. Tergov harakatlari davomida jami yetkazilgan moddiy zarar 47,7 milliard so‘m ekani aniqlanib, shundan 36,8 milliard so‘m undirilgan. Sud hukmi bilan firma mas’ullari 4 yildan 8 yilgacha ozodlikdan mahrum etilgandi.
Izoh (0)