Ozarbayjonning Minval nashri saytida Kaliningrad Kyonigsberg deb atalgan maqola chop etildi. Bu Xonkendi Stepanakert deb atagan “TASS” xabariga munosabat bo‘ldi.
Ozarbayjonning Minval nashri saytida Rossiyaning Kaliningrad shahri Kyonigsberg deb nomlangan maqolalar paydo bo‘ldi. Masalan, yangiliklardan biri “Rossiya Kyonigsbergda S-400 va zarba beruvchi tizimlarni joylashtirdi” sarlavhasi bilan chop etildi. Boshqa maqolalarda esa Orenburg shahri O‘rinbor, Volga daryosi esa Itil deb atalgan.
Minval Rossiyaning “TASS” axborot agentligi tomonidan Ozarbayjonning Qorabog‘dagi Xankendi shahrida rassom Ivan Ayvazovskiy haykalining buzilishi haqida chiqqan xabariga javob tariqasida shunday yozdi. “TASS” o‘z xabarida sovet davridagi toponimlar — Qorabog‘ o‘rniga Tog‘li Qorabog‘ va Xankendi o‘rniga Stepanakert nomlarini ishlatgan.
Ozarbayjon Tashqi ishlar vazirligi norozilik bildirib, “TASS”dan uzr so‘rashni talab qilgan. Vazirlik bayonotiga ko‘ra, davlat axborot agentligi tomonidan “Stepanakert” nomining qo‘llanilishi mamlakat hududiy yaxlitligiga nisbatan hurmatsizlik va haqorat sifatida qabul qilinadi.
Shuningdek, Ozarbyajon TIV o‘z bayonotida, o‘zaro javob chorasi sifatida, Ozarbayjon Rossiyadagi ayrim toponimlarni o‘zining tarixiy nomlari bilan atashidan ogohlantirgan. “TASS” axborot agentligi Ozarbayjonning tanqidiga javoban xabar matniga o‘zgartishlar kiritgan.
Izoh (0)