Kolumbiyaning sobiq prezidenti Alvaro Uribe protsessual firibgarlik va guvohlarni pora bilan og‘dirishga oid da’volar bo‘yicha aybdor deb topilib, 12 yilga uy qamog‘iga hukm qilindi. Bu haqda CNN xabar berdi.
Sobiq prezidentning hukmini Bogota sudi sudyasi Sandra Heredia 1-avgust kuni e’lon qilgan. Uribe esa o‘ziga qo‘yilgan ayblovlarni rad etmoqda. Uning advokati sud hukmiga apellyatsiya shikoyati berilishini ma’lum qilgan.
Sudyaga ko‘ra, Uribe yana bir jinoyat — prokurorga pora berish ayblovi bo‘yicha oqlangan. 73 yoshli Uribe 2002–2010-yillar oralig‘ida Kolumbiyaga prezidentlik qilgan va mamlakat tarixida sudlangan birinchi sobiq prezident bo‘ldi.
Mazkur ishning kelib chiqishi 2012-yilga borib taqaladi. O‘shanda hozirda hukmron bo‘lgan “Tarixiy pakt” partiyasining senatori Ivan Sepeda Uribeni harbiylashtirilgan guruhlar tuzishda ayblagandi. Uribe esa buni tuhmat deb bilib, Sepedaga qarshi sudga da’vo kiritgandi. Biroq 2018-yilda Kolumbiya Oliy sudi Uribening o‘zini guvohlarga ta’sir o‘tkazganlikda gumon qilib, tergov boshlagan.
2024-yilning may oyida prokuratura Uribega nisbatan rasmiy ayblov qo‘ygan — sudga ta’sir ko‘rsatish, protsessual firibgarlik va pora berish. Jarayon 67 kun davom etib, joriy hafta o‘z yakuniga yetgan.
Uribe butun sud jarayoni davomida o‘zini aybsiz deb ta’kidlab kelgan. Uni yana bir boshqa sobiq prezident Ivan Duke va boshqa muxolifatchi siyosatchilar qo‘llab-quvvatlamoqda. Aksincha, hukumat tarafdorlari sud hukmini adolat tantanasi sifatida kutib oldi. Senator Sepeda esa sud qarorini olqishlab, CNN’ga bergan intervyusida bu ish hali yakunlanmaganini ta’kidlagan.
“Bu hali yo‘lning boshlanishi”, degan u.
Izoh (0)