Ўзбекистонлик аксарият одамлар, дейлик ўрта қатлам вакилларининг айни кундаги асосий орзуларидан бири нима? Сиз ҳам янги машина сотиб олиш ва уй харид қилиш десангиз ажаб эмас. Инсон табиати шундайки, унга орзулари ҳақида гапирсангиз, орзуларига тез ва осон етишиш имкони борлигини айтсангиз, унинг учун сиздан-да яхши суҳбатдош йўқ. Шу сабаб ҳам уни тез ва осон ўзингизга эргаштирасиз. Ўзбекистонликларнинг энг нозик нуқтаси ҳам шу. Айнан шунинг учун ҳам бугун Ўзбекистонда автомобиль ва уй сотиб олиш билан боғлиқ фирибгарликлар урчиган. Ҳар куни ҳеч бўлмаганда бир марта мана шундай хабарларга кўзингиз тушади. “Дарё”га келиб тушган навбатдаги мурожаатлар ҳам айнан шу муаммо билан боғлиқ бўлди.
Тошкент вилоятининг Бўстонлиқ туманида яшовчи Маърифат Ўратова Тошкент шаҳрининг Сергели туманидаги автосалонларнинг биридан машина харид қилиш учун 83 миллион сўмдан ортиқ маблағ тўлаганини, бироқ айни кунга келиб алданиб қолганини айтмоқда.
2023 йилнинг 26 сентябрь куни Сергели туманидаги “Аvtоboom 007” автосалонидан оқ Gentra сотиб олиш учун 83 миллион 243 минг сўм тўладик. Шартномага кўра, машинамиз 2024 йилнинг 26 февраль куни бизга топширилиши керак эди. Лекин айни кунда ҳам машинадан дарак йўқ, дейди автомобиль харид қилиш учун автосалонга пул тўлаган фуқаро.
Мурожаатчиларга кўра, улар алданиб қолаётганини билгач, 2024 йилнинг ўтган даври мобайнида кўплаб ташкилотларга, жумладан, ички ишлар органларига ҳам мурожаат қилган. Шунингдек, Сергели туман прокуратурасига ҳам шикоят қилган. Аммо натижа чиқмаган.
Тошкент шаҳридаги яна бир ҳолат ўзбекистонликларнинг орзу-ҳавас ортидан қувиб, катта маблағга чув тушганлари ҳақида. “Дарё”га мурожаат қилган фуқарога кўра, улар янги автомобиль харид қилиш орзусида Тошкент шаҳрининг Яшнобод туманидаги Allianse Motors МЧЖга миллиардлаб пул тўлаб, айни кунда алданиб қолган. Уларнинг ҳисоб-китобига кўра, автомобиллар учун тўланган пуллар 100 миллиард сўмдан ошади.
Махтумқули кўчасидаги Allianse Motors автосалони фирибларига учганларданмиз. Уларга машина учун пул тўлаб, автокредитлар қилинган. Шу бўйича Яшнобод туман прокуратурасига мурожаат қилганмиз. Ариза берганмиз, улар чора кўрамиз дейишган лекин чора кўришмаган. Ундан кейин шаҳар прокуратурасига ўтган. Ҳозир Бош прокуратурага келиб турибмиз. Сарсон бўляпмиз. Фақат ваъда беришмоқда. Натижа йўқ, дейди автомобиль харид қилиш мақсадида автосалонга пул тўлаб куйиб қолган яна бир мурожаатчи.
Мурожаатчининг билдиришича, улар автомобиль учун тўловни банк орқали амалга оширган. Фақат автосалон ҳисоб рақамига унинг номидан тўланмаган.
Ўша пайтда менда гумон пайдо бўлганди. Нега бунақа десам, 5 фоизлик комиссиядан ютасиз дейишганди. Қолаверса, мен улардан аввал ҳам автокредит олганим учун ишонганман, дейди Улуғбек Турматов.
Мурожаатчи фуқаронинг ҳисоб-китобига кўра, У BYD русумли автомобиль учун 111 миллион сўм бошланғич тўлов, 11 миллиондан ортиқ суммани суғурта учун ва яна уч ойлик кредит тўлови учун 25 миллион сўм тўлаган.
Мен бошланғич тўловни шу йилнинг февраль ойида салон директори Давлатбек Нарзиев, яна Собир исмли раҳбарга тўлаганман. Ундан кейин бошқа директор қўйишди. Сўнгра Шаҳзода Нарзиева деган опаси бизга рўбарў келиб, пулларингни қилиб берамиз деб алдаб келишди. Менга ўхшаган алданганлар жуда ҳам кўп. Ҳозир на машинасини олишди, на пулини, дейди мурожаатчи.
Санжарбек Абдураҳмонов исмли мурожаатчи ушбу автосалонга BYD Champion русумли автомобиль учун автосалоннинг Суҳроб Султонов исмли ходимига 26 минг 500 доллар тўлаган.
2024 йилнинг июль ойида BYD Champion’га 26 минг 500 доллар пул тўлаганман. Машинани 4 кунда олиб келиб бераман деганди. Тўрт кундан кейин келсам пул ҳам, машина ҳам йўқ. Нима қилсангиз қилинг, ўлдириб юборинг деб туриб олган. Улар 15 киши бўлиб, шаҳар ўртасида ҳаммадан қўрқмай пул йиғган. Кўпчилиги кўчада юрибди. Шахсан мендан пул олган Суҳроб Султонов кўчада юрибди. Шаҳзоданинг укаси Давлатбек ҳам кўчада маза қилиб юрибди. Шаҳзода ҳамма айбни ўзим қилганман дея, барча шерикларини чиқариб юбормоқчи бўляпти. Сабаби бу ерда 15 нафар одам бўлса бошқа, битта одам бўлса бошқа вазият бўлади. Булар буни билади. Қолаверса, айбни бўйнига олаётган Шаҳзода ҳомиладор. Ёнидаги болалар ҳам биз билмаганмиз деб сувдан қуруқ чиқишга уриняпти. Аслида улар бизга ҳеч қандай машина қилиб берилмаслигини билган. Билса-да, пул йиғган, дейди Санжарбек Абдураҳмонов.
“Дарё” журналисти билан суҳбатлашган яна бир мурожаатчининг айтишича, у ҳам янги автомобиль сотиб олиш учун Allianse Motors автосалонига салкам 30 минг доллар тўлаган. Аммо айни кунга келиб, на пул бор, на машина.
Мурожаатчиларнинг ОАВ вакилларига билдиришича, Allianse Motors автосалонига автомобиль учун пул тўлаб алданганлар 120 нафарга борган. Улар тўлаган пул миқдори эса 100 миллиард сўмни ташкил қилмоқда.
Тошкент шаҳридаги Allianse Motors МЧЖ масъулларига нисбатан 2024 йилнинг июль ойида жиноят иши қўзғатилганди. Ўшанда автосалон мансабдори машина олиб келиб бериш ҳақида ёлғон ваъдалар бериб, фуқароларнинг 6 миллиард сўмдан ортиқ пулини ўз эҳтиёжларига сарфлаб юборгани маълум қилинганди. Автосалон масъулларига нисбатан Жиноят кодексининг 168-моддаси (фирибгарлик) ва бошқа модда билан жиноят иши қўзғатилган. Жамият мансабдор шахслари 19 нафар фуқарога автомашина олиб келиб бериш ҳақида ёлғон ваъдалар бериб, 6 миллиард 169 миллион сўм тўлов пулини ўзларининг эҳтиёжлари учун сарфлаб юборишгани аниқланган. “Кун.uz” нашрининг ёзишича, 2021 йил декабрь ойида давлат рўйхатидан ўтказилган Allianse Motors МЧЖ Давлатбек Нарзиевга тегишли.
Изоҳ (0)