Toshkent shahrida fuqarolarga uy va mashina olib berishni va’da qilib, ularni chuv tushirgan shaxsga sud hukmi o‘qildi. Bu haqda “Bu kun” informatsion dasturida ma’lum qilindi.
Qayd etilishicha, MCHJ rahbari o‘ziga tanish bir guruh shaxslar bilan jinoiy til biriktirib, 200 nafardan ortiq fuqaroning 15 milliard so‘m pulini qo‘lga kiritgan.
Sudlanuvchining so‘zlariga ko‘ra, firma 2022-yil yanvar oyida ochilgan. U mazkur firmaga mart oyida ishga joylashgan.
“Men martdan boshlab ishga kirishgan bo‘lsam, notarius orqali 50 ta mashina, 10 taga yaqin uy-joy olib berilgan. Firibgarlik qilib hech kimning pulini olmaganman. Norasmiy rahbar pullarni yechib ketgani haqida bizga ham ma’lumot berilgan. Lekin u qayerdaligi haqida xabarim yo‘q”, — deydi sudlanuvchi.
Jabrlanuvchilardan biri mashina olish uchun boshlang‘ich to‘lov sifatida 70 million so‘m, boshqasi esa uy uchun 178 million so‘m berganini bildirgan.
Iqtisodiyot sohasida kiruvchi jinoyatlarni sodir etgan 32 yoshli sudlanuvchi Jinoyat kodeksining 168-moddasi (firibgarlik) 4-qismi “a” bandida nazarda tutilgan jinoyatni sodir etganlikda aybli deb topilib, 9 yil muddatga ozodlikdan mahrum etildi.
“Avto 60 oy” ishi
“Avto 60 oy” MCHJning mansabdor shaxslari va boshqalarga nisbatan 2019-yil 12-oktabr kuni Jinoyat kodeksining 188-1-moddasi 1-qismi (pul mablag‘larini va (yoki) boshqa mol-mulkni jalb etishga doir noqonuniy faoliyat) bilan jinoyat ishi qo‘zg‘atilgan edi.
Tergov jarayonida J. Bahodirov o‘zining jinoiy sheriklari bilan oldindan til biriktirib, bir guruh bo‘lib, “Avto oltmish oy” va Catalea Media MCHJ va YTT “J.Baxodirov”ni tashkil etib, 3 oy muddat ichida O‘zbekistonda UzAuto Motors AJ tomonidan ishlab chiqarilgan avtomashinalarni yetkazib berishni va’da qilib, avtomashina rusumiga qarab, 1 million so‘mdan 10 million so‘mgacha bo‘lgan miqdorda pul olib, mablag‘larni qo‘lga kiritgani aniqlangan.
Jinoyat ishi bo‘yicha “Avto 60 oy” MCHJ bosh ofisidan olingan buxgalteriya hujjatlaridagi ma’lumotlar bo‘yicha 19 344 dan ortiq shaxslar bilan shartnomalar tuzgani aniqlangan va ushbu shartnomalar jinoyat ishiga qo‘shilgan. Tergov harakatlari davomida jami yetkazilgan moddiy zarar 47,7 milliard so‘m ekani aniqlanib, shundan 36,8 milliard so‘m undirilgan. Sud hukmi bilan firma mas’ullari 4 yildan 8 yilgacha ozodlikdan mahrum etilgandi.
Izoh (0)