Hech kimga sir emaski, ko‘plab jahon yulduzlari aktyorlik yoki xonandalik faoliyatidan katta miqdorda daromad oladi. Ba’zilar mablag‘laridan samarali va unumli foydalansa, boshqalar millionlab pulini ba’zan keraksiz va behuda narsalarga sarflaydi. Quyida barchaga sevimli bo‘lgan jahon yulduzlarning noodatiy va o‘ta qimmatbaho xaridlari bilan tanishamiz.
Jonni Depp
Jek Chittak qahramoni yulduzi turli sharoblarni juda yaxshi ko‘radi va eng sara sharob navini xarid qilish uchun hech qachon pul ayamaydi. Aktyor ushbu ichimlikka har oy kamida 30 ming dollar sarflaydi. Jonni Depp sharoblarni kolleksiya qilmaydi, balki deyarli har kuni iste’mol qiladi. Ehtimol, aktyorning so‘nggi vaqtlarda qarzga botishiga mazkur zararli odat sabab bo‘lgandir, deydi muxlislar.
Tom Kruz
Tom Kruzning sobiq turmush o‘rtog‘i Keti Holms homilador bo‘lganida, aktyor unga juda ajoyib hadya berdi: Kruz homiladorlikning qanday kechayotganini shaxsan kuzatish uchun 200 ming dollarga ultratovush tekshiruv apparatini sotib oldi.
Keti Perri
Xonanda va aktrisa Keti Perri sevgan insoni uchun hech narsani ayamaydi. Yulduz Rassell Brend bilan bir oila bo‘lgan vaqtda erining 35 yoshga to‘lgani munosabati bilan 200 ming dollarlik kosmosga sayohatni sovg‘a qilgan. Ammo Perrining sobiq turmush o‘rtog‘i bu imkoniyatdan foydalanmagan.
Peris Hilton
Aktrisa Peris Hilton 325 ming dollarga o‘zining iti uchun alohida uy xarid qilgan! Bunday uy ko‘rinishidan dabdabali qasrning kichik variantiga o‘xshaydi. Itning “xonadoni” isitish mexanizmi, konditsioner, chiroyli qandillar va uy hayvonlari uchun maxsus o‘yinchoqlar bilan jihozlangan.
Opra Uinfri
Qiziqarli va shov-shuvlarga boy intervyulari bilan mashhur bo‘lgan teleboshlovchi Opra Uinfri dunyodagi eng badavlat shaxslar ro‘yxatidan o‘rin olgan. U shu qadar boyki, yulduz tanasining shakliga mos keladigan dizaynerlik alohida vanna xarid qilgan.
Beyonse
Beyonse har doim eng hashamatli narsalarni xarid qilishga odatlangan. So‘nggi yillarda kovboy uslubida namoyon bo‘layotgan xonanda bir vaqtlar tilladan ishlangan leggings xarid qilgan. Qirolicha B ushbu noodatiy xarid uchun 100 ming dollar sarflagan va legginsni atigi bir necha bor kiygan.
Bundan tashqari, Beyonse va uning turmush o‘rtog‘i Jay Z qizi Blu Ayvining tug‘ilgan kuniga olmos bilan bezatilgan qo‘g‘irchoq sovg‘a qilgan. Ushbu hashamatli zavq ota-onaga 80 ming dollarga tushgan.
Rianna
Rianna tashqi ko‘rinishi ustida turli tajribalar qilishni yaxshi ko‘radi. Birgina sochlarni bo‘yash va imijni o‘zgartirish xonandaga yiliga 1 million dollar kerak bo‘ladi.
Selin Dion
Xonanda Selin Dion o‘zining go‘zal ovozini saqlab qolish uchun barcha narsaga tayyor. Misol uchun, u 2 million dollarga havo namlantiruvchi apparat sotib olgan, chunki quruq havo ovoz naychalariga zarra yetkazishi mumkin.
Izoh (0)