Fransiyalik hujumchi Antuan Grizmann Madridning “Atletiko” klubini tark etishi mumkin. Bunga asosiy sabab — futbolchiga Saudiya Arabistonidan jiddiy taklif tushmoqda. Bu haqda Fichajes nashri xabar berdi.
Manbaga ko‘ra, Saudiya Arabistonining “Al-Hilol” klubi Grizmannga jiddiy qiziqish bildirmoqda. Riyodliklar bosh murabbiyi Simone Indzagi 2018-yilgi Jahon chempioni orqali jamoa hujum chizig‘ini kuchaytirishni rejalashtirgan. Saudiya klubi futbolchi uchun 20 million yevrolik taklif tayyorlamoqda. “Atletiko” esa yangi futbolchilarni xarid qilish uchun Grizmanndan voz kechish masalasini ko‘rib chiqayotgani aytilmoqda.
Grizmann yaqinda “matraschilar” bilan shartnomasini 2027-yilgacha uzaytirgan bo‘lsa-da, jamoadagi o‘zgarishlar uning o‘yin amaliyotiga salbiy ta’sir ko‘rsatishi mumkin. Tiago Almada va Aleks Baena kabi yangi futbolchilarning jamoaga qo‘shilishi, shuningdek, Jakomo Raspadori bilan olib borilayotgan muzokaralar fonida Antuanning klubdan ketish ehtimoli ortib bormoqda.
“Al-Hilol” Grizmannga “Atletiko”da oladigan maoshidan yuqoriroq miqdor taklif qilishi mumkin. Bu omil futbolchining qaroriga ta’sir ko‘rsatishi mumkinligi ta’kidlanmoqda. So‘nggi vaqtlarda Saudiya Pro ligasiga ko‘plab yuqori darajadagi futbolchilar yo‘l olgani ham Grizmannning fikrini o‘zgartirishiga sabab bo‘lishi ehtimoldan xoli emas.
Ma’lumot uchun, Antuan Grizmann o‘tgan mavsumda “Atletiko” safida jami 56 ta o‘yinda maydonga tushib, 17 ta gol va 9 ta golli uzatma muallifiga aylangan. Transfermarkt portali uning qiymatini 18 million yevroga baholamoqda.
Izoh (0)