AQSH hukumati Ukrainaga Stryker bronetransportyorlarini yetkazib berish masalasini muhokama qilmoqda
AQSH Rossiyaning keyingi hujumlariga tayyorgarlik doirasida Ukrainaga Stryker zirhli jangovar mashinalari partiyasini yuborish imkoniyatini ko‘rib chiqmoqda. Bu haqda Politico o‘z manbalariga tayanib xabar berdi.
Nashrning yozishicha, AQSH ma’muriyati keyingi hafta oxirida yangi yordam paketini e’lon qilishi mumkin. Stryker zirhli mashinalari ushbu paketga kiritiladimi yoki yo‘q, hali noma’lum, chunki yakuniy qaror hali qabul qilinmagan. Shu bilan birga, gazeta suhbatdoshlari ma’muriyat ushbu bronetransportyorlarni keyingi paketda jo‘natishi mumkinligini ta’kidlagan.
Yanvar oyi boshida AQSH Ukrainaga 50 ta Bradley jangovar mashinasini yetkazib bermoqchiligi ma’lum bo‘lgandi. Taqqoslash uchun, Stryker zirhli mashinalari jangovar harakatlarda unchalik samarali emas, lekin boshqa afzalliklarga ega. Politico ta’kidlashicha, Stryker Bradley’dan ko‘ra shovqinsiz harakatlanadi va ko‘proq — 9 nafar askarni olib yurishga qodir (Bradely 6 nafar).
“Ukrainaliklarga bronetransportyorlar kerak, ular esa bizda bor. Stryker tanklar bilan jang qilish borasida Bradely kabi samarali emas, lekin piyoda askarlarni himoya qilish va jangda harakatlanish uchun yaxshi”, — dedi AQSH Mudofaa vazirligi vakili.
Avvalroq Politico zirhli texnika yetkazib berilgandan so‘ng AQSH Ukrainaga tank yetkazib berishni boshlashi mumkinligini yozgandi.
2023-yil boshida Fransiya Ukrainaga AMX-10 RC bronoavtomobillarini (yengil yoki g‘ildirakli tanklar deb ham ataladi) yetkazib berishini e’lon qildi. Ko‘p o‘tmay, Germaniya Marder jangovar mashinalari va Patriot zenit-raketa tizimlari batareyalarini yetkazib berishini e’lon qildi.
Ukraina rasmiylari Rossiya yaqin oylarda keng ko‘lamli hujum boshlashini kutmoqda. O‘z navbatida, Ukraina razvedkasi buning uchun Rossiya rasmiylari yana 500 ming kishini safarbar qilishi mumkinligini aytmoqda.
