Saudiya Arabistoni Haj ziyoratiga koronavirus pandemiyasi tufayli qo‘yilgan cheklovlarni bekor qildi. Bu haqda qirollikning Haj va umra ishlari vaziri Tavfik al-Robiya ma’lum qildi.
“Haj ziyoratiga boruvchilar soni pandemiyadan avvalgi darajaga qaytadi, yosh cheklovlari ham bo‘lmaydi”, — dedi vazirlik rahbari.
Vazirning so‘zlariga ko‘ra, butun dunyodan keladigan dindorlar Saudiya Arabistonida xizmat ko‘rsatish vakolatiga ega istalgan kompaniya bilan yana shartnomalar tuzishi mumkin.
“Biz hamkorlarimiz bilan birgalikda ziyoratchilarning tashrif tartib-taomillarini osonlashtirish uchun NUSK platformasini ishga tushirdik”, — deya qo‘shimcha qildi al-Rabiya.
Saudiya Arabistoni rasmiylari COVID-19 sababli so‘nggi uch yil davomida Hajga keladigan ziyoratchilar soniga cheklov qo‘ygandi.
“Al-Arabiya”ning eslatishicha, 2019-yilda 2,6 millionga yaqin kishi Haj ziyoratini ado etgan. Biroq pandemiya fonida qirollik rasmiylari 2020 va 2021-yillarda faqat cheklangan miqdordagi ziyoratchilarga, 2022-yilda esa 1 million kishiga Hajga kelishga ruxsat bergan. Shu bilan birga, 2022-yilda faqat 18 yoshdan 65 yoshgacha bo‘lgan, to‘liq emlangan yoki koronavirusga qarshi immunitetga ega, surunkali kasalliklari bo‘lmagan shaxslar Haj ziyoratini ado etishi mumkin edi.
2023-yilda Haj ziyorati 26-iyundan boshlanishi kerak.
Izoh (0)