General Lapin Rossiya Quruqlik qo‘shinlari bosh shtabiga rahbar bo‘ldi. Qodirov uni tanqid qilib, “uquvsiz” deb atagandi

Genral-polkovnik Aleksandr Lapin Rossiya Qurolli kuchlari Piyoda qo‘shinlari Bosh shtabi boshlig‘i etib tayinlandi. Bu haqda “RBK” Rossiya Mudofaa vazirligidagi manbasiga tayanib xabar berdi. Tayinlov haqida avvalroq “Ura.ru” nashri ham xabar bergandi.

Kreml vakili Dmitriy Peskov general Lapinning bu lavozimga tayinlangani haqidagi xabarlarni tasdiqlamadi va rad etmadi ham. “Na tasdiqlay olaman, na rad eta olaman. Prezidentning ba’zi farmonlari ochiq, ba’zilari esa maxfiy belgisi ostida bo‘ladi. E’lon qilinayotgan farmonlar orasida bunday hujjat yo‘q edi”, — dedi u.

2017-yildan buyon Lapin Rossiya Markaziy harbiy okrugiga qo‘mondonlik qilib kelgandi. 2022-yil oktabri oxirigacha u Lugansk viloyatini bosib olgan “Markaz” qo‘shinlar guruhi qo‘mondoni lavozimini ham egallagan. Noyabrda Markaziy harbiy okrug qo‘mondoni vazifalarini vaqtinchalik bajaruvchi etib general Aleksandr Linkov tayinlangani ma’lum bo‘ldi.

Kuzda Lapin Checheniston rahbari Ramzan Qodirov tomonidan faol tanqid qilina boshlagandi, xususan, u generalni Limanni qo‘ldan boy berishda, Ukraina qurolli kuchlari front uchastkalaridan biriga bostirib kirishida ayblab, uni “uquvsiz” deb atagandi. Qodirovning pozitsiyasini “Vagner” guruhi asoschisi Yevgeniy Prigojin ochiqchasiga qo‘llab-quvvatlagandi.