AQSH va Yaponiya qurolli kuchlari o‘z qo‘mondonlik tuzilmalarini tezkorlik bilan integratsiyalashtirib, qo‘shma operatsiyalarini kengaytirmoqda, chunki Vashington va uning Osiyodagi ittifoqdoshlari Xitoy va Tayvanning ehtimoliy nizosiga tayyorlanmoqda. Bu haqda Financial Times xabar berdi.
Dengiz piyodalari uchinchi ekspeditsiya korpusi qo‘mondoni general-leytenant Jeyms Birman aytishicha, Amerika va Yaponiya armiyasi so‘nggi bir yil ichida sezilarli darajada o‘sgan.
Uning so‘zlariga ko‘ra, AQSH va uning Osiyodagi ittifoqdoshlari G‘arb mamlakatlariga Ukrainani Rossiya bilan urushda qo‘llab-quvvatlash imkonini bergan asosdan nusxa olgan va shu tarzda Xitoyning Tayvanga bostirib kirishi kabi ssenariylarga tayyorlanmoqda.
Bundan tashqari, Yaponiya va AQSH yangi avlod yadro reaktorlarini ishlab chiqishda hamkorlik qiladi. Yaponiya va AQSH 9-yanvar kuni energetika vazirlari darajasidagi muzokaralar chog‘ida yangi avlod yadro reaktorlarini ishlab chiqishda ikki tomonlama hamkorlikni mustahkamlash haqida kelishib oldi, deb yozadi Kyodo agentligi.
Yaponiya sanoat vaziri Yasutosi Nisimura va AQSH energetika vaziri Jennifer Grenxolm Tokio va Vashington keyingi avlod takomillashtirilgan reaktorlarini, shu jumladan, “mamlakatlarning har birida, shuningdek, uchinchi mamlakatlarda” kichik modulli reaktorlarni ishlab chiqish va qurish sohasidagi hamkorlikni kuchaytirishi haqida kelishib oldi.
Muzokaralardan keyin jurnalistlar qarshisida nutq so‘zlayotib, Nisimura Amerika tomoni Yaponiyaning yadro energetikasi sohasidagi dekarbonizatsiyani kuchaytirishga qaratilgan o‘zgarishlarni ijobiy baholaganini aytdi.
O‘tgan oyda Yaponiya hukumati zarurat yuzaga kelgan taqdirda, eski yadro reaktorlari yangilanishini, shu tariqa, ularning ekspluatatsiya muddati 60 yilga uzaytirilishini ma’lum qilgandi.
Tomonlar, shuningdek, suyultirilgan tabiiy gaz yetkazib berish va energetika xavfsizligi bo‘yicha boshqa masalalarda yanada yaqinroq hamkorlik qilishini aytdi.
Izoh (0)