AQSH prezidenti Donald Tramp Demokratik partiya vakillari uning impichmentini yana muhokama qilayotganini aytib, bo‘layotgan voqealarni siyosiy hujum deb atadi va respublikachilarga tashabbuskorlarni kongressdan chetlashtirish imkoniyatini ko‘rib chiqishni taklif qildi. Bu haqda u o‘zining X ijtimoiy tarmog‘idagi sahifasida ma’lum qildi.
“Demokratlar haqiqatan ham nazoratdan chiqib ketdi. Radikal so‘llar yana impichment mavzusiga qo‘l urdilar. Hech kim tanimaydigan, hech kim hurmat qilmaydigan ikkita kongressmen Donald Trampga qarshi impichment haqida gapirmoqda - taxminan yigirmanchi marta, nimaga ekanligini ham bilmay turib”, deb yozdi Tramp.
Uning kinoya bilan ta’kidlashicha, demokratlar mantig‘iga ko‘ra, chegarada tartib o‘rnatgani, inflyatsiyaga qarshi kurashgani, Ukraina va Eron bo‘yicha qat’iy pozitsiyasi, jumladan, uning so‘zlariga ko‘ra, Tehronni moliyalashtirishni to‘xtatgani uchun impichmentga uchrashi mumkin ekan. Bu esa uning fikricha, 7-oktyabr kuni Isroilga hujumning oldini olishi mumkin edi.
Trampning qayd etishicha, demokratlar “impichmentdan qurol sifatida foydalanmoqda” va “Amerika nimaga asoslangan bo‘lsa, barchasidan nafratlanmoqda”. U respublikachilarni qattiqroq harakat qilishga chaqirdi.
“Balki biz ham ularning qoidalari bo‘yicha o‘ynab, haqiqiy jinoyatlar uchun demokratlarni chetlashtira boshlashimiz kerakdir?”, deydi prezident.
Ilgari Trampga ikki marta — 2019 va 2021-yillarda impichment e’lon qilingan, biroq ikkala holatda ham Senat uni lavozimidan chetlatishni qo‘llab-quvvatlamagan.
Amerika ommaviy axborot vositalarining xabar berishicha, ehtimoliy impichment muhokamasining yangi bosqichi demokratlarning ayblovlari, jumladan, tashqi siyosat masalalari va Kongressga tazyiq o‘tkazish bilan bog‘liq. Tramp demokratlarni yangi impichment urinishida aybladi
29-aprel kuni Demokratik partiyadan amerikalik kongressmen Shri Tanedar prezident Trampga qarshi impichment rezolyutsiyasini taqdim etdi. Rezolyutsiyada keltirilgan moddalar orasida: odil sudlovga to‘sqinlik qilish, xalqaro tajovuzkorlik, noqonuniy idoralar tashkil etish, korrupsiya va “hokimiyat vakolatlarini zo‘ravonlarcha suiiste’mol qilish” kabi bandlar mavjud.
Izoh (0)