AQShning amaldagi prezidenti Donald Tramp Vashingtonda favqulodda vaziyat rejimini tasdiqladi va saylangan prezident Jo Baydenning 20-yanvardagi inauguratsiyasi oldidan xavfsizlikni ta’minlash uchun qo‘shimcha federal kuchlarni yo‘naltirishni buyurdi, deb yozadi Meduza.
Oq uy saytida xabar berilishicha, favqulodda vaziyat rejimi 11-yanvardan 24-yanvargacha davom etadi. Bu davrda Favqulodda vaziyatlarda boshqaruv bo‘yicha federal agentlik favqulodda vaziyat oqibatlarini yumshatish uchun zarur bo‘lgan qurilma va resurslarni o‘z ixtiyoricha aniqlaydi, safarbar qiladi va taqdim etadi. Favqulodda himoya choralari federal moliyalashtirish hisobiga ta’minlanadi.
Vashington hukumati favqulodda vaziyat rejimini Donald Tramp tarafdorlari Kapitoliyga shiddatli hujum uyushtirganidan keyin 7-yanvar kuni joriy qilgan edi. Shundan keyin Vashington meri Myuriel Bouzer AQSh Ichki xavfsizlik vazirligidan shaharda inauguratsiya arafasida xavfsizlikni saqlash uchun qo‘shimcha choralar kiritishni so‘ragan edi.
AQSh Milliy gvardiyasi inauguratsiya chog‘ida Vashingtonda xavfsizlikni saqlash uchun 15 ming nafargacha harbiy xizmatchini jalb qilishga tayyor, dedi Milliy gvardiya byurosi rahbari Deniyel Xokanson.
11-yanvar kuni Vashington meri Myuriel Bouzer, shuningdek, ikki qo‘shni shtat — Merilend va Virjiniya shtatlari gubernatorlari Larri Xogan va Ralf Nortem AQSh aholisini 6-yanvardagi “shafqatsiz qo‘zg‘alon” va davom etayotgan koronavirus pandemiyasi tufayli Jo Baydenning inauguratsiyasi uchun Vashingtonga kelmaslikni so‘radi.
Avvalroq AQSh Federal qidiruv byurosi (FQB) Amerikaning barcha shtatlari markazlari va Vashingtonda 16—20-yanvar kunlari qurolli noroziliklar rejalashtirilayotgani haqida ogohlantirgan edi.
2021-yil 6-yanvar kuni kongressmenlar demokrat Jo Bayden g‘alaba qozongan prezident saylovlari natijalarini tasdiqlashi kerak edi. O‘sha kuni Vashingtondagi to‘qnashuvlarda besh kishi halok bo‘ldi. Saylov yakunlaridan norozilik belgisi sifatida Kapitoliy binosiga kelishga Tramp da’vat qilgan edi, shundan keyin AQSh kongressi vakillar palatasiga impichment to‘g‘risidagi rezolyutsiya kiritildi. Rezolyutsiya bitta ayblovdan iborat — qo‘zg‘alonga gijgijlash. Unda aytilishicha, “prezident Tramp AQSh va hukumat institutlari xavfsizligini jiddiy xatar ostiga qo‘ygan”.
Izoh (0)