AQShning sobiq prezidenti Donald Tramp Senatda impichment haqidagi ish bo‘yicha jarayonda uni himoya qiladigan huquqshunoslar guruhiga yetakchilik qilish uchun ikkita advokatni yolladi. Bu haqda Tramp devonxonasi ma’lumotiga tayanib, “RBK” xabar berdi.
Sudda sobiq prezident manfaatlarini advokatlar Devid Shon va Bryus Kastor himoya qiladi. Tramp devonining ta’kidlashicha, advokat Shon Tramp va boshqa maslahatchilar bilan bo‘lajak sud jarayoniga tayyorgarlik ko‘rish ishlarini allaqachon boshlab yuborgan.
“Shon va Kastor ushbu impichmentni konstitutsiyaga zid degan fikrni ma’qullamoqda”, — deyiladi devonxona bayonotida.
Avvalroq Reuters va CNN telekanallari Tramp jamoasini bir nechta advokatlar, jumladan, impichment ishi bo‘yicha uning asosiy himoyachisi bo‘lishi kerak bo‘lgan Batch Bauyers va Debora Barberi tark etgani haqida xabar tarqatgandi. Advokatlar Jonni Gasser, Greg Xarris va Josh Xovard ham sobiq davlat rahbarining jamoasini tark etgan.
Bunga Trampni himoya qilish strategiyasi bo‘yicha yuzaga kelgan kelishmovchilik sabab bo‘lgan. Sobiq prezident advokatlarning o‘z dalillarini noyabrda bo‘lib o‘tgan saylovlardagi qalbakilashtirish holatlari haqidagi bayonotlarga asoslashini talab qilgan. Huquqshunoslar esa himoya uchun Tramp prezident lavozimini tark etganidan keyin impichment noqonuniyligi haqidagi faktni asos qilib olmoqchi bo‘lgan.
AQSh Vakillar palatasi 13-yanvar kuni Trampga impichment e’lon qildi. Bunga yanvar oyining boshida Vashingtonda o‘tkazilgan tartibsizliklar sabab bo‘ldi. Sobiq davlat rahbarining tarafdorlari Kapitoliy binosiga bostirib kirishi oqibatida besh kishi halok bo‘ldi. Demokratlar Tramp fuqarolar orasida tartibsizlik harakatlarini qo‘zg‘atgan degan fikrda.
Demokrat senator Chak Shumerning aytishicha, impichment bo‘yicha tinglovlar Kongressning yuqori palatasida 8-fevraldan keyin boshlanadi. AQSh prezidenti Jo Baydenning so‘zlariga ko‘ra, Trampga impichment e’lon qilish muvaffaqiyatli yakunlanmaydi, chunki Senatda impichmentni ma’qullaydigan ovozlar yetarli bo‘lmaydi.
Donald Tramp unga qarshi boshlangan impichment jarayonini “eng katta jodugar ovining davomi” deb atagan va prezidentlik saylovlari yakunlari bilan bog‘liq holda bundan keyin ham zo‘ravonlik qilishni istamasligini aytgan.
Izoh (0)