AQSh Senati 9-fevral, seshanba kuni sobiq prezident Donald Trampga nisbatan impichment jarayoni Amerika konstitutsiyasiga zid emas, deb ovoz berdi. Bu haqda The Washington Post’ga tayanib, “RBK” xabar berdi.
Jarayonning konstitutsiyaviyligini yoqlab 56 senator ovoz berdi, 44 nafari qarshi chiqdi. Trampni Respublikachilar partiyasining ko‘pchilik a’zolari qo‘llab-quvvatladi, ammo olti nafari demokrat bilan birga ovoz berdi.
Impichment haqidagi rezolyutsiya senatga yanvar oxirida berilgan edi. Ungacha jarayonni boshlash vakillar palatasida ma’qullangan edi. Bunga sobiq davlat rahbari tarafdorlarining parlament binosiga hujumi sabab bo‘ldi. Tramp qo‘zg‘olonga da’vat qilishda ayblanmoqda.
Kapitoliyga hujum 6-yanvar kuni sodir bo‘ldi. Prezident saylovi natijalaridan norozi bo‘lgan Tramp tarafdorlari parlament binosiga bostirib kirib, Jo Baydenning g‘alabasi uzil-kesil tasdiqlanishi kerak bo‘lgan Kongress majlisini to‘xtatib qo‘ydi. Namoyishchilar va politsiya o‘rtasidagi to‘qnashuvlarda besh kishi halok bo‘ldi. Tramp Kapitoliyga hujumni qoraladi. Bungacha esa o‘z tarafdorlarini Kapitoliy tepaliklariga tinch yurish uyushtirishga chaqirgan edi.
Izoh (0)