AQSH prezidenti Donald Tramp Oq uy maslahatchisi Alissa Farax-Griffin bilan 2020-yilgi prezident saylovi natijalari e’lon qilinishidan avvalroq bo‘lgan shaxsiy suhbat chog‘ida o‘z mag‘lubiyatini tan olgan. Bu haqda mansabdor ayol CNN telekanali efirida ma’lum qildi, deb yozadi “RBK”.
“U televizor orqali Jo Baydenni ko‘rganida: ‘Shu odamga yutqizib qo‘yganimga ishona olasizmi?’ — deb o‘rinsiz gapirib qo‘ygandi. Aslida u matbuot anjumani chog‘ida koronavirus haqida gapirayotganida ham buni tan olgandi… u Jo Bayden yutdi, deb gapirib yuborgandi”, — deb esladi Farax-Griffin.
AQSH prezidenti saylovlari 2020-yil noyabrida bo‘lib o‘tgandi. Tramp Respublikachilar partiyasidan qayta saylanish uchun o‘z nomzodini qo‘ygandi, uning raqibi demokrat Jo Bayden edi. Dastlabki hisob-kitoblar Baydenning g‘alabasini ko‘rsatdi. Dekabrda bu natijani saylovchilar kollegiyasi ham tasdiqladi. Tramp esa o‘z mag‘lubiyatini tan olmadi va natijalar qalbakilashtirilganini da’vo qildi, biroq noyabr oxirida uning ma’muriyati hokimiyatni topshirish jarayonini boshlashga tayyorligini ma’lum qildi.
15-noyabr kuni Tramp Twitter’da “u (Bayden) g‘olib bo‘ldi, chunki saylovlar qalbakilashtirilgan edi”, deb yozdi, lekin ko‘p o‘tmay, u “qalbaki OAVlar ko‘z oldida”gi g‘alabani nazarda tutganini aniqlashtirdi. “Men hech narsani tan olmayman!” — deya aniqlik kiritdi u.
Demokratning g‘alabasi 2021-yil 6-yanvarda kongress sessiyasida rasman tasdiqlanishi kerak edi, ammo shu kuni Trampning tarafdorlari uni qo‘llab-quvvatlab miting uyushtirdi. Aksiya tartibsizliklarga aylanib ketdi, namoyishchilar Kapitoliyga bostirib kirdi. Sessiya to‘xtatildi, bino evakuatsiya qilindi, tartibsizliklar oqibatida besh kishi halok bo‘ldi.
Shundan keyin Bayden va boshqa demokratlar Trampni zo‘ravonlikka da’vat qilishda aybladi. Davlat rahbarining Twitter va boshqa ijtimoiy tarmoqlardagi akkauntlari bloklandi. Trampga qarshi impichment jarayoni tashkillashtirildi, biroq senatda bo‘lib o‘tgan ovoz berishda u oqlandi.
2021-yil 20-yanvar kuni Bayden AQSH prezidenti lavozimiga kirishdi.
Izoh (0)