Кўплаб режиссёрлар учун кадрда актёрларнинг импровизацияси баҳсли мавзу ҳисобланади. Айримлари сценарийда эркинликка йўл қўймай, қатъий равишда сценарий ўйнашни талаб қилади. Бошқалари эса якуний монтажда дастлаб режалаштирилмаган жонли саҳналарни сақлаб қолади. Фильмларнинг сўнгги вариантларига киритилган актёрларнинг энг машҳур импровизацияларини тўпладик.
“Чўқинтирган ота” фильмидаги мушук
Кинематография оламидаги энг машҳур ва эсда қоларли импровизациялардан бири Френсис Форд Копполанинг “Чўқинтирган ота” фильмидаги Марлон Брандо намойиш қилган ижродир. Сценарийга кўра, мафия бошлиғи Корлеоне Дон Вито ҳузурига келган дафн бюроси эгасига насиҳат қилади. Шу пайт Брандонинг тиззасига мушук сакраб чиқади. Актёр довдирамасдан, худди ҳеч нарса бўлмагандек монологини давом эттириб, думли ҳамкасбини силаб-сийпалаб, ролини ижро этади.
Саҳна шунчалик табиий чиқадики, мушукни фильмнинг якуний версиясида қолдиришга қарор қилинади. Қўлида мушук билан ўтирган мафия бошлиғи образи “Чўқинтирган ота”нинг ўзига хос рамзи ва ташриф қоғозига айланади.
ТВ шоу ва “Шуъла”
Жек Николсон режиссёр Стенли Кубрикнинг “Шуъла” триллеридаги ролини моҳирона ижро этади. Энг машҳур саҳналардан бирида Николсоннинг қаҳрамони — ичкиликбоз Жек Торренс хотини яширинган хонанинг эшигини болта билан чопади. Болта эшикни бузгач, ақлдан озган эрининг юзи кўринганда Жек Николсон: “Мана, Жонни ҳам келди!” дейди.
Бу жумлани актёр АҚШда жуда машҳур бўлган Жонни Карсоннинг телешоусидан ўзлаштирган. Кубрик дастлаб бу гапнинг маъносини англамайди. Режиссёрга сўзларнинг маъноси тушунтирилгач, у Николсоннинг импровизациясини фильмда сақлаб қолишга қарор қилади.
Райан Гослингнинг “Барби” фильмдаги тантанаси
“Барби” фильмининг иккинчи қисмида Марго Робби ижро этган бош қаҳрамон Кеннинг олдига “Мачо дача Ҳата Ҳаус”га келганида Райан Гослингнинг репликаларидан бири бутунлай импровизация бўлган.
Барби Кенга унинг “мажбуриятсиз севгилиси” бўлишга тайёрлигини айтгач, Кен бурчак ортига ўтиб, “Сублиме!” деб бақиради. Рус тилидаги дубляжда бу сўз “Аллилуйя!” деб таржима қилинган. Сўнгра яна хотиржам ҳолатда Кен суҳбатга қайтади. Гослингнинг импровизацияси шунчалик кутилмаган эдики, Марго Робби кулиб юборган ва бу ибора фильмда қолдирилган.
“Ҳурилиқо” фильмидаги айёр Ричард Гир
Ричард Гирнинг импровизацияси “Ҳурилиқо” фильмининг шундоқ ҳам қизиқарли сценарийсини сезиларли даражада жонлантирди. Мелодраманинг бир саҳнасида Эдвард Льюис Вивиан Уордга қимматбаҳо маржон совға қилади. Жулия Робертс тақинчоққа қўл чўзганида, Ричард Гир кутилмаганда қутичани ёпиб қўяди. Актриса бундан қўрқиб кетади ва ҳайратдан кулиб юборади. Унинг самимий кулгиси ва ҳис-туйғулари режиссёр Гарри Маршаллга ҳам ёқади.
“Титаник”даги импровизациялар
“Титаник” фильмида ҳам актёрлар импровизация қилган. Кейт Уинслет ижро этган қаҳрамон Билли Зейн гавдалантирган куёвнинг қўлидан қутулмоқчи бўлганида, у эркакка тўғноғич санчиши керак эди. Бироқ Уинслет бошқача йўл тутади: бунинг ўрнига, у эркакнинг юзига тупуради. Бундай ёндашув режиссёрга маъқул келади, чунки бир неча соат олдин Жек Доусон қизга “Титаник” палубасидан тупуришни ўргатганди.
Леонардо ДиКаприо ҳам “Титаник” кемасининг тумшуғида суратга олинаётганда, қўлларини ёйиб: “Мен дунёнинг ҳукмдориман” дея ҳайқиради. Бу ибора сценарийда бўлмаган, аммо Жеймс Кемерон уни “чўкмас” кеманинг ёш йўловчиси амбицияларига мос ва табиий деб топади.
“Озод Жанго” фильмида сабр-тоқатли ДиКаприо
Леонардо ДиКаприонинг актёрлик истеъдодига шубҳа йўқ. У режиссёр Квентин Тарантинонинг “Озод Жанго” фильмини суратга олиш жараёнида маҳоратини яна бир бор намоён этади.
Ғазаб отида плантатор ва қул савдогари Келвин Кенди қўли билан стол устидаги кичик қадаҳни уриб юборади. У қадаҳни синдириб, қўлини қаттиқ кесиб олади, аммо роли ўйнашни тўхтатмайди. Кейинги бир неча дақиқа давомида ДиКаприо қўлидан қон оқиб турган ҳолда саҳнани давом эттиради. Унинг ўз қонини актриса Керри Вашингтоннинг юзига суртаётган лаҳзаси Квентин Тарантинога кучли таассурот қолдиради. Актёрнинг бу ажойиб ижросини фильмда қолдиришга қарор қилинади.
“Автомобильдан сақланинг” фильмдаги узоқ олинган саҳна
Элдар Рязановнинг “Автомобильдан сақланинг” комедиясининг якунида ажойиб совет актёри Иннокентий Смоктуновский троллейбуснинг олд ойнаси орқали севгилисига узоқ вақт тикилиб туради.
Саҳна бу қадар чўзилиши кутилмаган эди. Режиссёр суратга олишни якунлаш ҳақида кўрсатма беришни унутиб қўйган бўлса-да, Смоктуновский яна бир неча сония шундай туради. Бундай узоқ давом этган муҳаббат эътирофи Рязановни лол қолдиради ва у саҳнани фильмда сақлаб қолишга қарор қилади.
Изоҳ (0)