Баъзи машҳурлар “Суратга олиш мумкин эмас!” тамойилига амал қилиб яшайди ва ҳатто севимли юлдузлари билан узоқ кутилган учрашувни камераларга муҳрлаш орзусидаги мухлислари учун ҳам истисно қилмайди. Бунинг сабаби фақатгина юлдузлик касаллиги ёки инжиқлик эмас. Баъзида рад этишлар ортида жиддий сабаблар яширинган бўлади: фобия, стресс, танқид ёки одамовилик.
Киану Ривз: фожиали воқеадан сўнг жамоатчилик эътиборидан четлашиши
Голливуднинг энг камтарин актёрларидан бири Киану Ривз карьераси бошиданоқ омма эътиборидан қочиб келади. “Матрица” юлдузини фақат янги фильми премерасидаги қизил гиламда учратиш мумкин. Актёр бир неча бор ўз шахси атрофидаги ҳаддан ташқари эътибор ва доимий шов-шувдан безовта бўлишини тан олган.
Киану Ривз 2001 йилдаги фожиали воқеадан сўнг онгли равишда жамоат ҳаётидан воз кечган — ўшанда унинг севгилиси Женнифер Сайм автоҳалокатда ҳалок бўлган. Бу ҳодисадан кейин тез машҳурликка эришаётган актёр чуқур тушкунликка тушиб қолади. У атайлаб жамиятдан узоқлашади: фақат зарур ҳолларда кўчага чиқади, дам олишга бормайди. Бу унга оғир йўқотиш ҳақида тинимсиз эслатиб турадиган сурбат журналистлардан яширинишнинг ягона йўли эди.
Бироқ Ривз ўз касбини чин дилдан севади. Руҳий қийинчиликларга қарамай, у кинода суратга тушишни давом эттиради, лекин зиёфатларга боришдан бош тортади ва тадбирларда иштирокини камайтиради. Актёр қайғу билан кадр ортида курашди: Киану Ривз хайрия ишлари билан фаол шуғуллана бошлади ва ҳатто синглисини йўқотишига сабаб бўлган лейкемияга қарши курашиш учун ўз жамғармасини ташкил этди.
Энн Ҳетеуэй: нафрат ва таъқиб туфайли яширинча ҳаёт кечирмоқда
Интернет зўравонлиги шафқатсиз ҳодиса бўлиб, ундан ҳатто энг нуфузли шахслар ҳам ҳимояланмаган. 2013 йилда актриса Энн Ҳетеуэй нафрат тўлқинига дучор бўлди. Унинг фаолиятидаги бу даҳшатли давр ҳатто “Хатахейт” номини олди. “Хўрланганлар” фильмида “Энг яхши иккинчи пландаги аёл роли” учун “Оскар” мукофотини қўлга киритганидан сўнг, одамлар Эннни кўзбўямачиликда, сунъий хатти-ҳаракатларда ва сохта “малика” образини яратишда айблашади.
Оммавий таъқиб туфайли актриса деярли ишсиз қолди: продюсерлар салбий муносабат пайдо бўлишидан чўчиб, у билан ҳамкорлик қилишдан бош тортишди. Энн Ҳетеуэйнинг ўзи жамоатчилик эътиборидан четда қолишга ва одамлар орасига чиқмасликка мажбур бўлди. У илгари хурсандчилик билан қабул қилган юқори эътибор энди стресснинг асосий манбасига айланди. Узоқ вақт давомида Ҳетеуэй зиёфатлар ва оммавий тадбирларга бормасликка ҳаракат қилди, худди шу сабабга кўра мухлислари билан суратга тушишни рад этди.
Айнан ўша пайтда у ҳеч кимга ўзини синдиришга йўл қўймаслигини тушунди. Муҳокамалар ва салбий фикрлар унинг касбининг ажралмас қисми эканлигини англади. Бироқ ҳозирга қадар доимо ёш кўринадиган актриса барча эътибор ва камера объективлари унга қаратилганида ноқулайлик ҳис қилади.
Жеймс Ҳетфилд: суратлар ўрнига жонли мулоқот
Афсонавий Metallica гуруҳининг хонандаси ва асосчиси Жеймс Ҳетфилднинг фотосессиялари саноқли. Машҳур рокер кўпроқ саҳнада жонли куйлаб, омма билан биргаликда машҳур қўшиқларни ижро этишни маъқул кўради.
Унинг фалсафаси мухлислар билан биргаликдаги суратларга ҳам тааллуқли: Ҳетфилд бир лаҳзалик суратлар ўрнига қисқа, юзма-юз суҳбатни афзал билади. У мухлислар билан суратга тушмаслигини ва имзо бермаслигини очиқ тан олади. Бунинг ўрнига, у улар билан беш дақиқа суҳбатлашиб, самимий қўл сиқишга тайёр. Унинг фикрича, телефон экрани орқали ҳатто бир сониялик шахсий вақтини йўқотиш на унга, на мухлисга фойда келтиради. Жеймс саҳнада ҳам, шахсий учрашувда ҳам мухлислар билан чуқурроқ ва мазмунли мулоқот қилишни ақлли танлов деб билади, бироқ унинг бу нуқтайи назарини ҳамма ҳам қўллаб-қувватламайди.
Флоренс Уэлч: камера олдидаги хавотир ва қўрқув
Florence and the Machine рок гуруҳининг солисти туғма уятчанлик ва тортинчоқликдан бутун умри давомида азият чекади. Бунга ишониш қийин, чунки саҳнада Флоренс Уэлч бутун стадионларни жунбишга келтиради. Аммо аслида вазият бошқача.
Фаолиятининг бошидан бошлаб Уэлч мухлисларини янги суратлар билан камдан-кам хурсанд қилган, жамоатчиликка эҳтиёткорлик билан ёндашган, шунингдек, ижтимоий тармоқларга ишончсизлик билан қараган. У нотаниш одамлар билан мулоқотда ўзини жуда ноқулай ҳис қилади ва камера объективлари олдида довдираб қолади. Фотосуратлар эса Флоренс Уэлчда ҳақиқий хавотир уйғотади: у доимо ўзини бошқалар билан таққослайди, ташқи кўринишига танқидий ёндашади ва агар гап кундалик медиа маконида бўлиш ҳақида кетса, ваҳимага тушади.
Хонанда бутун қуввати ва меҳрини мусиқа ва жонли ижро орқали мухлисларига етказади.
Изоҳ (0)