Ўзбекистон томонининг кўмаги билан бир гуруҳ украиналик болалар дам олиш ва реабилитация учун Тошкентга келди. Бу ҳақда Украинанинг Ўзбекистондаги элчихонаси хабар берди.
Болалар учун 12 кунлик махсус дам олиш ва психологик тикланиш дастури ташкил этилган. Улар Украинанинг жанговар ҳаракатлардан азият чекаётган турли вилоятларидан, хусусан, Харьков, Херсон, Николаев, Запорожье, Суми, Хмелницкий, Лвов ва Киев шаҳарларидан ташриф буюрган.
Гуманитар миссия Украина элчихонасининг мурожаатига жавобан Ўзбекистон томонининг таклифи ва тўлиқ кўмаги билан ташкил этилган. У руҳий мувозанатни тиклашга, ҳар кунги ҳаво ҳужумлари ва ракета зарбаларидан чалғиб дам олишга қаратилган.
Болалар ва уларнинг кузатувчилари Тошкент халқаро аэропортида тантанали равишда кутиб олинди, шундан сўнг улар Тян-Шан тоғлари этагидаги гўзал водийга йўл олди. Оромгоҳдаги кечки қабул самимий ва илиқ руҳда ташкил этилди, дейилади элчихона хабарида.
Ташриф дастурини амалга оширишда Ўзбекистоннинг деярли барча тегишли вазирлик ва идоралари иштирок этмоқда. Ҳар куни болаларни “Миллий қадриятлар куни”дан тортиб, “Спорт ва саломатлик куни”гача бўлган мавзули тадбирлар, ижодий танловлар ва экскурсиялар кутмоқда.
Бундай комплекс ёндашув Ўзбекистон томонининг ушбу мураккаб даврда украиналик болаларга ҳар томонлама ёрдам ва кўмак кўрсатишдан чуқур манфаатдор эканини яққол кўрсатади, дейди Украина элчихонаси.
Маълумот ўрнида, 2023 йилда ҳам Ўзбекистонга Украинадан дам олиш ва реабилитация учун 45 бола ҳамда беш нафар ҳамроҳлик қилувчи гуруҳ келганди. Ўшанда улар 12 кун давомида “Анор” тоғ оромгоҳида дам олганди. Бундан ташқари, Ўзбекистон украиналик болаларга инсонпарварлик ёрдамини, шунингдек, Украинага гуманитар ёрдам юборганди.
Изоҳ (0)