Япониянинг Осака шаҳрида ўтказилаётган “EXPO-2025” кўргазмасида сув шоуларини намойиш этиш ва саёз ҳовуздан фойдаланиш вақтинча тўхтатилди. Ташкилотчилар сув намуналарида юқори миқдорда бактерияларни аниқланди. Бу ҳақда Al Arabiya хабар берди.
Кўргазма бошланганидан бери меҳмонлар сайёҳлик ҳудудида майда учувчи ҳашаротларнинг кўпайганидан шикоят қилган. Апрель ойида очилган “EXPO 2025” доирасида 160 дан ортиқ мамлакат, минтақа ва халқаро ташкилотларнинг павильонларига олти миллион киши ташриф буюрган.
Expo очилишидан олдинги сўровномалар жамоатчилик орасида унга катта қизиқиш йўқлигини кўрсатган эди. Бироқ сўнгги ҳафталарда ташриф буюрувчилар сони сезиларли даражада ортгани кузатилмоқда. Шунга қарамай, илгари чиқинди полигони бўлган Осака кўрфазидаги сунъий оролда жойлашган кўргазма майдонининг экологик ҳолати юзасидан хавотирлар ортиб бормоқда.
Ташкилотчилар 5 июнь куни легионелла бактериялари юқори даражада аниқлангани сабабли меҳмонлар, жумладан болалар салқинланадиган саёз сув зонасини ёпишга мажбур бўлган. Шу сабабли ҳар куни ўтказиладиган фаввора шоуларига ҳам вақтинча чеклов киритилган.
Ҳозирда сув ҳавзаларини тозалаш ишлари олиб борилмоқда. Эътиборлиси, кўргазма бошланишидан бир оз олдинроқ ушбу ҳудудда ёнғин хавфини туғдириши мумкин бўлган даражадаги метан гази аниқланган. Яқинда эса меҳмонларни безовта қилаётган, чақмайдиган майда чивинларни йўқотиш учун ташкилотчилар ҳудудга инсектицид пуркаган.
Жаҳон ярмаркаси номи билан танилган ва бир вақтлар Парижга Эйфель минорасини олиб келган Expo феномени 1851 йилда Лондонда бўлиб ўтган Кристал сарой кўргазмасидан бошланган. Ҳозирги кунда бу тадбир ҳар беш йилда дунёнинг турли нуқталарида ташкил этилади.
Изоҳ (0)