Сўнгги тўрт ҳафта ичида Германия чегарачилари 3 278 нафар мигрантни мамлакатга киритмади. Бу ҳақда Deutsche Welle хабар берди.
Маълум бўлишича, 8 майдан бошлаб Германияда янги тартиб кучга кирди. Ушбу тартиб бошпана сўровларини чегара пунктларида дарҳол рад этишга имкон беради. Бироқ умумий рад этишларнинг фақат 160 таси ички ишлар вазири Александр Добриндт томонидан тасдиқланган янги қоидаларга биноан амалга оширилган.
Шу даврда чегарада “заиф гуруҳлар”га мансуб 46 кишининг бошпана сўровлари қабул қилинган. Бу гуруҳга болалар, ҳомиладор аёллар ва касалликлари борлар киради. Улар учун Добриндт қарори таъсир қилмайди.
Ноқонуний мигрантлар сони ошмоқда
Сўнгги ойларда Германияга ноқонуний кириб келган мигрантлар сони ўсмоқда. Апрель ойида 5 079 киши кирган бўлса, май ойида бу рақам 10 фоизга ошиб, 5 571 нафарга етган. Бу 2025 йил бошидан буён энг юқори кўрсаткичдир.
Йил бошидан бери Германияга яшаш учун рухсати бўлмаган жами 25 298 киши кириб келган. Агар шу тенденция давом этса, йил охирига қадар мигрантларнинг умумий сони сўнгги йиллардаги энг юқори даражага чиқиши мумкин.
Чегарада бошпана сўровларини рад этиш тартиби
Май ойида Германия ички ишлар вазири 2015 йилгача амал қилган тартибни қайта тиклади. Ушбу қоидага кўра, Европа Иттифоқи давлатларидан келган бошпана сўровчилари чегара пунктларида тўғридан-тўғри мамлакатга киритилмаслиги мумкин. Фақат болалар, ҳомиладорлар каби “заиф гуруҳлар” бундан мустасно.
Добриндт Германияга киришни рад этишлар сони “босқичма-босқич ошишини” ваъда қилган. ОАВ маълумотларига кўра, чегаралардаги федерал полиция ходимлари сони 11 мингдан 14 мингга кўпайган, назорат пунктлари сони ҳам ошган. Дастлабки икки кун ичида чегара пунктларида ушланган мигрантларнинг тахминан 80 фоизи чиқариб юборилган.
Изоҳ (0)