Россия Украинанинг Одесса шаҳрини ўз назоратига олишни, сўнгра Руминия ва Молдова чегарасига етиб боришни режалаштирмоқда. Бу ҳақда Украина президенти Владимир Зеленский Одессада ўтаётган “Украина—Жануби-Шарқий Европа” саммитида маълум қилди.
Украина давлат раҳбари Одесса Россия учун нишон эканини таъкидлаган.
“Ниҳоят, биз яна ўз гўзал шаҳримиз Одессага қайтиб келдик. Бу ажойиб шаҳар Россиянинг нишонига айланиб қолган. Улар босиб олинган ҳудудлардаги сон-саноқсиз шаҳар ва қишлоқларни вайрон қилгани каби, Одессани ҳам йўқ қилишни истайди. Россиянинг ҳарбий режалари айнан шу минтақа — Одессага, сўнгра Молдова ва Руминия чегараларига қаратилган. Албатта, ҳозир бизга ҳимоя керак. Аммо бундан-да кўпроқ, ушбу воқеалар ҳеч қачон такрорланмаслиги учун узоқ муддатли кафолатларга муҳтожмиз”, дейди Владимир Зеленский.
Зеленский Одесса вилояти минтақани беқарорлаштириш нуқтаи назаридан Россия учун муҳим мақсад эканини билдирган.
“Биз буни илгари Болқонда кўрганмиз, у ерда Россия миллатлараро зиддиятларни кучайтирган, бузғунчилик ҳаракатларини амалга оширган ва ҳатто давлат тўнтаришларини уюштиришга уринган”, Украина президенти.
У саммит иштирокчиларини урушдан кейинги хавфсизлик кафолатларини амалий зарурат сифатида кўриб чиқишга даъват этди.
“Ҳаво ҳужумидан ҳимояланишдан тортиб кибертаҳдидларгача — бизга ҳақиқий тийиб туриш ва тезкор муносабат билдириш воситалари керак. Келинг, битимларимизни, қуролли кучларимизни ва инфратузилмамизни кўриб чиқайлик ҳамда мамлакатларимиз хавфсизлигини таъминлайдиган барча нарсани мустаҳкамлайлик”, дея таъкидлаган Владимир Зеленский.
Бундан аввал Владимир Зеленский Украина ойига 27 минг кишини, Россия эса 40-50 минг кишини сафарбар қила олишини маълум қилганди.
Изоҳ (0)