Илон Маск 11 июнь куни ўтган ҳафтада ижтимоий тармоқларда АҚШ президенти Дональд Трамп билан бўлган жанжал давомида у ҳақида ёзган баъзи постларидан афсусда эканини айтди. Бу ҳақда Euronews хабар берди.
“Ўтган ҳафта президент ҳақидаги баъзи постларимдан афсусдаман. Бу ҳаддан ошиш эди”, деди миллиардер ўзининг Х платформасида.
У айнан қайси постлар ҳақида гапираётганини маълум қилмаган. Х’даги бир қатор постларида Маск Трампнинг савдо тарифлари таназзулга олиб келишини айтиб, уни импичментга чақирганди. Оқ уй бу даъволарни пучга чиқарди. Ўшандан бери Маск баъзи постларни, жумладан, импичментга чақирувчи постни ўчириб ташлаган.
Трамп, ўз навбатида, Маскнинг “ақлдан озганини” айтиб, харажатларни тежаш чораси сифатида миллиардернинг федерал шартномаларини, шу жумладан SpaceX ва Tesla билан шартномаларини бекор қилиш билан таҳдид қилган.
9 июнь куни Трамп журналистларга SpaceX компаниясига тегишли Starlink сунъий йўлдош интернет-компаниясини тугатиш режаси йўқлигини билдирган.
“Биз яхши муносабатда эдик ва унга фақат яхшилик тилайман”, деган Трамп.
Маск Трампга 2024 йилда қайта сайланишига ёрдам бериш учун катта молиявий ёрдам кўрсатганди. Сайлов давомида тахминан 277 миллион доллар сарфлагани айтилган. Трамп қайта сайланганидан сўнг, Маск ҳукумат харажатларини камайтириш ва самарадорликни ошириш мақсадида “Ҳукумат самарадорлиги бўлими” ёки DOGE деб аталадиган бўлимга раҳбарлик қилган.
Маск май ойи охирида бу маъмуриятни бизнесга қайтиш истаги ва DOGE’даги харажатларни камайтириш бўйича саъй-ҳаракатларидан ҳафсаласи пир бўлгани учун тарк этганди.
Изоҳ (0)