АҚШ президенти Дональд Трамп болалигида най чалганини айтиб, найчи бўлиши мумкинлиги ҳақида ҳазиллашди. Бироқ отаси бундай касб йўлини маъқулламаганини билдирди.
The New York Post газетаси подкастида президент болалигида ота-онаси уни махсус қобилиятларни баҳолаш учун синовларга олиб борганини эслади.
“Синов ўтказувчилар отамнинг олдига келиб: “Ўғлингизнинг ажойиб мусиқа қобилияти бор, у зўр мусиқачи бўлиши мумкин”, дейишди. Аммо бу отам эшитишни истаган гап эмасди”, дейди Трамп.
У ўзининг мусиқий эшитиш қобилияти борлигини қўшимча қилган.
“Улар (синов ўтказувчилар) нота чалишди – бу ҳозиргача эсимда. Кейин бошқа саволлар беришди, сўнгра бир соат олдин қайси нота чалинганини сўрашди. Менимча, тўғри жавоб бердим”, дея давом этди президент.
Оқ уй раҳбарининг айтишича, най чалиш дарсларида қатнашган.
“Мен жуда қисқа вақт давомида най чалганман. Бунга ишонасизми? Най чалиш дарсларини олганман. Сиз мендан бу ҳақда сўраган биринчи одамсиз. Найчи бўлишим мумкин эди. Лекин буни унчалик ёқтирмасдим”, дея жавоб берди президент мусиқа асбобларини чаласизми, деган саволга.
Шу билан бирга, у ҳозир бу асбобда бирор нарса чала олишига шубҳа билдирган. Шунингдек, Трамп мунтазам равишда мусиқа тинглашини ва уни бошқаларга эшиттиришини тан олган. У мусиқачиларни истеъдодли одамлар деб билишини айтиб, мусиқа ёзишни мураккаб касб деб атаган.
“Мен иложи борича кўпроқ мусиқа тинглайман. Турли жанрларни ёқтираман. Кантри мусиқасини жуда яхши кўраман, менимча, Британиялик мусиқачи Элтон Жон ажойиб, мутлақо ажойиб”, дейди Трамп.
Изоҳ (0)