АҚШ Ироқ элчихонасининг асосий бўлмаган ходимларини хавфсизликка таҳдидлар кучайгани сабабли эвакуация қилади. Бу ҳақда BBC хабар берди.
Расмийлар эвакуацияга айнан нима сабаб бўлганини батафсил очиқламаган. Бироқ сўнгги кунларда Эрон ядровий дастури бўйича музокаралар тўхтаб қолган, деб ёзган BBC. Мудофаа вазирлиги маълумотларига кўра, Ироқда 2,5 мингга яқин АҚШ ҳарбийлари жойлашган.
“Биз барча элчихоналаримизда ходимларнинг муносиб ҳолатини доимий равишда баҳолаб борамиз. Сўнгги таҳлилларимизга асосланиб, Ироқдаги миссиямизни қисқартиришга қарор қилдик”, деди АҚШ давлат департаменти расмийси 11 июнь куни.
Бу ҳаракат АҚШ ва Эрон ўртасидаги бир неча ҳафталик музокаралардан сўнг амалга оширилгани айтилмоқда. АҚШ президенти Дональд Трамп 11 июнь куни Эрон уранни бойитишни тўхтатишига ишончи камайиб бораётганини билдирган.
Шу ҳафта бошида у узоқ вақтдан бери дипломатик эмас, балки ҳарбий ёндашувни қўллаб-қувватлаб келаётган Исроил бош вазири билан ҳам 40 дақиқалик телефон суҳбати ўтказганди.
Яқин Шарқнинг кўп қисмларидан ходимларни эвакуация қилиш қарори ҳақида сўралганда, Трамп шундай деди: “Ҳа, улар кўчирилмоқда, чунки у хавфли жой. Нима бўлишини эса вақт кўрсатади”.
Эрон ўз навбатида мамлакатнинг уранни бойитиш дастури фуқаролик энергиясини ишлаб чиқариш учун мўлжаллангани ва у атом бомбасини қуришга уринмаётганини билдирган.
Изоҳ (0)