Америка Қўшма штатлари маъмурияти Лос-Анжелесдаги вазиятни барқарорлаштириш учун қатъийроқ чоралар кўриш зарур бўлса, иккиланмаслигини билдирди. Бу ҳақда АҚШ бош прокурори Пем Бонди CNN журналистига маълум қилди.
“Ҳозирда Калифорнияда вазиятимиз яхши. Олдинга силжишдан чўчимаймиз. Агар яна қўшимча чоралар кўриш керак бўлса, биз иккиланмаймиз”, дея жавоб берди у АҚШ Қуролли кучларидан мамлакатда тартибни сақлаш учун фойдаланишга имкон берувчи қўзғолонларни бостириш тўғрисидаги қонунни қўллаш имконияти ҳақидаги саволга.
Унинг сўзларига кўра, маъмурият Лос-Анжелесда жорий этилган комендантлик соати кескинликни пасайтиришига умид қилмоқда. Бироқ, у федерал ҳокимият ҳам зарур ҳолларда ҳаракат қилишга тайёр эканлигини таъкидлади.
The New York Times хабарига кўра, 11 июнь куни Лос-Анжелес, Мишн-Вехо (Калифорния штати), Юджин (Орегон штати), Роли (Шимолий Каролина штати), Сан-Антонио (Техас штати), Сиэтл (Вашингтон штати), Сент-Луис (Миссури штати) шаҳарларида маъмуриятнинг миграция сиёсатига қарши янги норозилик намойишлари ўтказилиши режалаштирилган. Бир қатор шаҳарлар маъмурлари ушбу намойишларга тайёргарлик кўрмоқда.
Чоршанба куни Лос-Анжелес кўчаларида Миллий гвардия хизматчиларига қўшиладиган 700 нафар денгиз пиёдаси навбатчилик қилади. Денгиз пиёдалари ва миллий гвардиячилар АҚШ Иммиграция ва божхона полицияси (ICE) ходимларини ўз вазифаларини бажараётганда қўриқлайди, аммо ҳибсга олиш жараёнларида иштирок этмайди.
Ички хавфсизлик вазирлиги 9 июнь куни ICE миграция қонунчилигини бузганлик учун кунига 2 минг кишини ҳибсга олаётганини маълум қилди. АҚШнинг аввалги президенти Жо Байден даврида бу кўрсаткич 2024 йилда кунига 311 кишини ташкил этган.
Изоҳ (0)