Ғазода 11 июнь куни автобусга ҳужум уюштирилиши оқибатида кўплаб Ғазо гуманитар жамғармаси (ҒГЖ) ходимлари ҳалок бўлгани айтилмоқда. Бу ҳақда CNN хабар берди.
Бу ҳаракатда АҚШ ва Исроил томонидан қўллаб-қувватланадиган гуманитар ёрдам ташкилоти ҲАМАСъни айбламоқда. ҲАМАС эса ҳозирча айбловларга жавоб бермаган. Ходимлар Хон Юнуснинг ғарбий қисмидаги тарқатиш марказига йўл олгани айтилган. ҒГЖ йигирмадан ортиқ жамоа аъзолари бўлган автобус маҳаллий вақт билан соат 22:00 атрофида ҲАМАС томонидан ҳужумга учраганини маълум қилган.
“Биз ҳали ҳам фактлар йиғяпмиз, аммо билганларимиз даҳшатли: камида 5 киши ҳалок бўлган, кўпчилик жароҳатланган ва баъзилар гаровга олинган бўлиши мумкинлигидан қўрқяпмиз”, дейилади ҒГЖ баёнотида.
ҒГЖ ҲАМАСни сўнгги кунларда ташкилотга бир неча бор таҳдид қилганликда айблаганди. 8 июнь куни ҲАМАС оммавий ахборот воситалари орқали “душман, жиноятчи ёки хоинлар билан ҳамкорлик қилаётган ҳар қандай тузилма ёки шахсга қарши қатъий зарба бериш учун тўлиқ ваколат ва мандатга эга”лигини айтганди.
Изоҳ (0)