Херсонда Украина томонидан жанг қилаётган кўнгиллилар ва вайрон бўлган аэропорт. Урушнинг 267-кунидан фоторепортаж
Украина ҳукумати Россия томонидан Одесса, Днепр ва Харьков вилоятидаги инфратузилмага янги зарбалар йўллангани ҳақида хабар берди. «Нафтогаз Украни» ширкати Украина шарқида газ ишлаб чиқариш объектлари вайрон бўлгани ва шикастланганини маълум қилди. Днепрда снарядлар оқибатида 23 киши жабрланди, турар жой бинолари вайрон бўлди. Запорожье вилоятининг Волнянск шаҳрида ракета ҳужуми оқибатида етти киши ҳалок бўлди.
Гаага суди россиялик Игорь Гиркин ва Сергей Дубинскийни, шунингдек, украиналик Леонид Харченкони 2014 йилда Донбассда юз берган Boeing ҳалокатида айбдор деб топди ва сиртдан умрбод қамоқ жазосига ҳукм қилди. Россиянинг Брянск вилоятида автомобилда кетаётган икки маҳаллий аҳоли Украина билан чегарада минага учраб портлади, улардан бири ҳалок бўлди. Херсон вилоятида россиялик ҳарбийлар томонидан ўлдирилган 63 кишининг жасади топилгани айтилмоқда. Донецк, Николаев, Харьков ва Херсон вилоятларининг озод қилинган ҳудудларида Украина полицияси жами мингга яқин тинч аҳолининг жасадини топди.
Meduza урушнинг 267-кунидан асосий фотосуратларни тақдим этди.
Украина халқаро легиони Херсондаги фронтда
Херсоннинг Днепр ўнг қирғоғи қисмидаги Украина позицияларида турган снайпер. Украина халқаро легиони 2022 йил февраль ойида Владимир Зеленский буйруғи билан Украина Қуролли кучларининг ҳудудий мудофааси доирасида тузилган. Урушнинг дастлабки кунларида дунёнинг 52 мамлакатидан 20 мингга яқин одам легионга қўшилиш учун рўйхатдан ўтган.Фото: Getty Images
Халқаро легион аскарлари Херсоннинг Днепр чап қирғоғи қисмидаги Россия позицияларини ўққа тутишга тайёрланмоқда. Легионга энг кўп АҚШ, Буюк Британия, Польша, Болтиқбўйи мамлакатлари, Канада, Норвегия, Финляндия ва Даниядан аскарлар келган. Россия ва Беларусь фуқаролари легионга қабул қилинмайди, аммо Қуролли кучлар маълумотларига кўра, россияликлардан жуда кўп аризалар келган.Фото: Getty Images
Халқаро легион жангчиси Херсон вилоятидаги Россия позицияларига қарата ўқ узмоқда.Фото: Getty Images
Халқаро легион аъзолари фонар ёруғида қаҳва қайнатмоқда.Фото: Getty Images
Запорожье вилоятининг ўққа тутилиши оқибатлари
Украина полицияси Россия қўшинларининг ракета зарбасидан ҳалок бўлганлар жасадини қидирмоқда. 17 ноябрга ўтар кечаси Россия қўшинлари Запорожье вилоятидан 30 километр шимоли-шарқда жойлашган ва Украина Қуролли кучлари назорати остидаги Волнянск шаҳрини ўққа тутди. Ракета турар жой биносига келиб тушди, у бутунлай вайрон бўлди. Сўнгги маълумотларга кўра, етти киши ҳалок бўлган.Фото: Reuters
Полиция ходимлари рус ракетаси билан вайрон қилинган уй вайроналари орасидан топилган жасадларни кўздан кечирмоқда.Фото: Scanpix
Россия ракетаси тушган жойда қутқарувчилар ишламоқда.Фото: Scanpix
Донецк вилоятидаги Украина госпитали
Ҳарбий шифокорлар украиналик аскарнинг ярасини боғламоқда. Донецк вилоятида фаол жанглар давом этмоқда. Вилоят ҳарбий бошқармаси маълумотларига кўра, 17 ноябрь куни эрталаб Россия Донецкдан 60 километр шимолда Украина назорати остидаги Часов Яр шаҳрини ўққа тутган. Уч кишининг ўлими ҳақида хабар берилган. Бундан ташқари, рус қўшинлари Баҳмут ва Угледарга зарба беришда давом этмоқда.Фото: Reuters
Тиббиёт ходимлари Украина Қуролли кучларининг яраланган аскарига биринчи тиббий ёрдам кўрсатмоқда.Фото: Reuters
Херсонда вайрон қилинган аэропорт
Чернобаевка қишлоғидаги «Херсон» халқаро аэропорти биноси, унинг ҳудудида рус қўшинларининг бузилган ҳарбий техникалари қолиб кетган. Урушнинг биринчи кунларида Россия армияси учун Чернобаевканинг қўлга олиниши стратегик аҳамиятга эга эди — аэропорт 27 февралда рус ҳарбийлари томонидан эгалланди. Ўшандан бери Украина Қуролли кучлари Чернобаевкадаги Россия позицияларига мунтазам ва муваффақиятли ҳужум қилди. 11 ноябрь куни Украина Қуролли кучлари Чернобаевкани озод қилди.Фото: Anadolu
Аэропорт деворида Украина Қуролли кучлари Олий бош қўмондони, генерал Валерий Залужнийнинг сурати.Фото: Anadolu
Аэропортда ташлаб кетилган рус истеҳкомлари.Фото: Anadolu
Чернобаевка аэропорти ҳудудидаги ҳарбий самолётлар.Фото: Anadolu
Изоҳ (0)