Шубҳали тўловларни амалга оширманг — Миграция агентлиги фуқароларни огоҳлантирди

Миграция агентлиги фуқароларни лицензиясиз хорижга ишга жўнатиш билан шуғулланаётган компаниялардан огоҳлантирди.

Вазирлар Маҳкамасининг 2025 йил 22 апрелдаги 252-сонли қарорига мувофиқ, фуқароларини хорижда ташкиллаштирилган тартибда ишга жойлаштириш фаолияти билан Миграция агентлиги шуғулланади. Шунингдек, “Хусусий бандлик агентликлари тўғрисида”ги қонунга мувофиқ, фақат Миграция агентлиги томонидан лицензия берилган хусусий бандлик агентликлари ушбу фаолият билан шуғулланишга ҳақли.

Миграция агентлиги томонидан ўтказилган назорат тадбирларда “баъзи бир ишбилармонлар”нинг ижтимоий тармоқлардаги эълонлар орқали консалтинг ёки ахборот хизмати ниқоби остида фуқаролардан пул йиғиб хизмат кўрсатмагани ҳамда лицензиясиз хорижга ишга жўнатиш билан шуғулланаётгани аниқланган. Ушбу жамиятларга нисбатан  қуйидаги таъсир чоралари қўлланилган:

• Worldvisа МЧЖда 2025 йил 9 апрелда текширув ўтказилган ва 11 апрелда 112,5 миллион сўм жарима қўлланилиб, Тошкент туманлараро иқтисодий судга даъво аризаси киритилган;
• Everyone Consult МЧЖда 9 апрелда текширув ўтказилган, 11 апрелда 112,5 миллион сўм жарима қўлланилган, Тошкент туманлараро иқтисодий судга даъво аризаси киритилган;
• Adworld Group МЧЖда 24 апрелда текширув ўтказилган, 28 апрелда 112,5 миллион сўм жарима қўлланилган, Урганч туманлараро иқтисодий судга даъво аризаси киритилган;
• Rich Result МЧЖда 15 майда текширув ўтказилган, 21 майда 112,5 миллион сўм жарима қўлланилган, Тошкент туманлараро иқтисодий судга даъво аризаси киритилган;
• Ravon Consult Group МЧЖ хусусий бандлик агентлигида 15 майда текширув ўтказилган, 26 майда 112,5 миллион сўм жарима қўлланилган, Бекобод туманлараро иқтисодий судга даъво ариза киритилган.

“Лицензиясиз ташкилотлар орқали хорижда ишга жойлашишга уриниш молиявий ва ҳуқуқий хавф-хатарга дучор бўлишига олиб келади. Хавфсизлигингиз ўз қўлингизда”, дея огоҳликка чақирди Миграция агентлиги ва расмий рўйхатдаги агентликлар билан ҳамкорлик қилишга чақирди.

“Ҳар қандай шартномани имзолашдан олдин уни синчиклаб ўқиб чиқинг. Шубҳали тўловларни амалга оширманг”, дейилади агентлик хабарида.

Юқоридаги фирмалардан бири — Adworld Group хорижга ишга жойлаш ваъдаси билан одамларни чув туширгани ҳақида август ойи бошларида хабар қилинганди. Текширув натижаларига кўра, ушбу МЧЖ ижтимоий тармоқларда Черногория, Сербия, Англия, Литва, Норвегия, Уммон ва Япония каби давлатлардаги иш ўринларини реклама қилган. Фуқароларга консалтинг баҳонасида, аслида хорижда ишга жойлаштириш хизматларини таклиф этган. Мазкур фаолият “Хусусий бандлик агентликлари тўғрисида”ги қонун талабларига зид равишда, лицензиясиз амалга оширилган.

Ушбу компаниянинг ноқонуний фаолиятини айрим кўп сонли кузатувчиларга эга бўлган блогерлар ҳам ижтимоий тармоқларда кенг тарғиб қилган. Блогерлар орқали берилган нотўғри реклама одамларда ишонч уйғотиб, кўплаб фуқаролар компания хизматларидан фойдаланиш учун пул тўлашга рози бўлган ва оқибатда алданиб қолган. 

Рақобат қўмитаси 22 август куни ушбу МЧЖни реклама қилган икки блогер — @iwash_tashkent саҳифасини юритувчи  О.Жўраев ва @abdurahmonmufid саҳифасини юритувчи А.Абдураҳмонов судга берилганини эълон қилди.