“ПСЖ” дарвозабонига “Манчестер Сити”, “Челси” ва “Бавария” қизиқиш билдирмоқда

Италия терма жамоаси посбони Жанлуижи Доннарумма “Пари Сен-Жермен” клубини тарк этишга яқин турибди. Бу ҳақда Football Italia нашри хабар берди.

Манбага кўра, парижликлар Доннаруммага жамоани тарк этиш кераклигини очиқ-ойдин билдирган. Шу боис, яқин бир ҳафта ичида унинг келажаги бўйича аниқ қарор қабул қилиниши кутилмоқда. Айни дамда дарвозабон учун курашда “Манчестер Сити”, “Челси” ва “Бавария” клублари иштирок этмоқда.

Маълумотларга кўра, “Манчестер Сити” яқин кунларда трансфер борасида фаол ҳаракат бошлайди. “Бавария” ҳам дарвозабонга қизиқаётганини билдирган, аммо ҳозирча музокаралар бошланмаган. “Челси” эса вазиятни диққат билан кузатмоқда, бироқ ҳали ҳеч қандай расмий таклиф билан чиқмаган.

Аввалроқ “ПСЖ” спорт директори Луиш Кампуш “Лилль” дарвозабони Люк Шевалени харид қилиш вариантини кўриб чиқаётгани, шу сабаб Доннарумма жамоани тарк этиши мумкинлиги ҳақида хабарлар тарқалган эди. Журналист Фабрицио Романонинг хабар беришича, Париж клуби Люкни 40 миллион евро эвазига харид қилмоқда. Бу ҳолат Доннарумманинг кетиши аниқ эканлигини билдиради.