Россия президенти Владимир Путин яқин кунларда АҚШ раҳбари Дональд Трамп билан бўлиб ўтадиган учрашувда Украинадаги босиб олинган ҳудудларни тан олишни талаб қилмоқчи. Бу ҳақда Европа ва Украина раҳбарларига таяниб, The Wall Street Journal хабар берди.
Путин эвазига рус армияси ёзги ҳужум пайтида кирган Суми, Харьков ва Днепропетровск вилоятларидан қўшинларни олиб чиқишни таклиф қилиши мумкин. Кремль билан келишувга интилаётган Трамп бундай талабларни қабул қилиши эҳтимоли бор. Бироқ Украина ва Европа мамлакатлари буни рад этиши кутилмоқда.
Бу Трампнинг Украинани урушни давом эттиришда айблашига, унга ҳарбий ва разведка ёрдамини тўхтатишига, кейин эса дипломатик жараёндан бутунлай чиқиб кетишига олиб келиши мумкин, дейилади хабарда.
The Telegraph манбаларига кўра, Украина Россия томонидан аннексия қилинган ҳудудларни халқаро миқёсда тан олишга тайёр эмас, бироқ фронт чизиғи бўйлаб сулҳга розилик билдириш эҳтимоли мавжуд. Украина президенти Владимир Зеленский босиб олинган ҳудудларни ҳарбий йўл билан қайтариб олиш мушкул эканини тан олади. У можаронинг дипломатик ечимларини излаш тарафдори.
Путин ва Трамп бу йил бир неча бор телефон орқали мулоқот қилган. АҚШ президентининг “Путиндан ҳафсалам пир бўлди” деган баёнотларига қарамай, улар ўртасида очиқ зиддият бўлмаган.
Уларнинг суҳбати дўстона руҳда ўтади, гарчи Путин кўпинча узоқ монологларга берилиб кетса-да, одатда сабрсиз бўладиган Трамп уни диққат билан тинглайди ва Россия—АҚШ муносабатлари ҳамда иқтисодий ҳамкорликни тиклаш масалаларини муҳокама қилади, дейди манбалар.
Путиннинг асосий талаби эса — Украинада босиб олинган ҳудудлар устидан Россия назоратини халқаро миқёсда тан олишдир.
Изоҳ (0)