Европа Иттифоқи (ЕИ) аэропортларида ҳар қандай суюқликлар ҳажмини 100 миллилитр билан чеклаш талаби тез орада бекор қилиниши мумкин. Бу ҳақда Еврокомиссия маълумотларига таяниб, Euronews хабар берди.
Таъкидланишича, тегишли ўзгариш аэропортларга янги авлод хавфсизлик ускуналарининг ўрнатилиши билан боғлиқ. Аввалига 100 мл суюқлик чеклови анъанавий рентген қурилмалари суюқ портловчи моддаларни аниқлай олмагани учун жорий қилинган эди. Энди эса портловчи моддаларни аниқлаш имконини берувчи замонавий сканерлар пайдо бўлган.
Бундай технологиялар Рим ва Милан каби айрим ЕИ аэропортларида аллақачон ўрнатилишни бошлаган. Европа фуқаро авиацияси конференциясида июнь ойида тасдиқланган янги тизим эндиликда ишлаб чиқарувчилар томонидан тестдан ўтказилиб, расмий тасдиқ олгач, амалиётга кенг жорий этилиши кутилмоқда.
Агар якуний рухсат берилса, йўловчилар қўл юкида каттароқ ҳажмдаги суюқликларни олиб ўтиши мумкин бўлади. Бироқ янги тизим ҳали барча аэропортларда мавжуд эмас — у анъанавий қурилмаларга қараганда анча қиммат. Ҳозирча Италиядаги 7 та терминал ушбу турдаги технология билан таъминланган. Бундан ташқари, Германия, Ирландия, Литва, Малта, Швеция ва Нидерландиядаги айрим аэропортлар ҳам юқоридагилар қаторига қўшилиши кутилмоқда.
Изоҳ (0)