Украинани Европа Иттифоқи ва НАТОга қабул қилиш мумкин эмас, чунки бу Ғарб давлатларининг Россия билан урушга киришишига олиб келади. Бу ҳақда Венгрия бош вазири Виктор Орбан Facebookъдаги саҳифасида билдирган.
“Агар Европа Иттифоқи Украинани ўз сафига қўшса, бу унинг учун дарҳол очиқ уруш бошланишини, ўт очиш тўхтатилгандан сўнг эса Европа ва Россия ўртасида доимий уруш хавфи пайдо бўлишини англатади”, дея ёзди Виктор Орбан.
Унинг айтишича, Украинанинг НАТОга қабул қилиниши Россия билан зудлик билан уруш бошланишини ва учинчи жаҳон уруши хавфини келтириб чиқариши мумкин.
“Шу сабабли Украина НАТО ёки Европа Иттифоқига қабул қилинмаслиги керак. Венгриянинг асосий хавфсизлик манфаатлари Украина билан умумий интеграция тузилмасининг бир қисми бўлмасликни тақозо этади”, деб таъкидлади Венгрия бош вазири.
Унинг бундай баёнотига нафақат НАТО ва ЕИ саммитлари, балки Будапештда бир қатор венгриялик сиёсий ва жамоат арбобларининг Украинани қўллаб-қувватловчи декларацияси эълон қилиниши ҳам сабаб бўлган. Улар томонидан тайёрланган ҳужжатда Россияга нисбатан айбловлар ва Украинага ҳарбий ёрдам кўрсатишдан бош тортаётган ҳамда ушбу мамлакатнинг шошилинч равишда ЕИга қабул қилинишига қарши чиқаётган Венгрия ҳукуматини танқид қилиш ўрин олган.
Бироқ Орбаннинг фикрича, “декларацияни имзолаганлар Венгрия манфаатларини эътиборсиз қолдирмоқда”.
“Улар Россия-Украина уруши давом этишининг аниқ оқибатларини етарлича баҳоламаяпти ва уруш давом этар экан, ҳар куни янги фойда олиши мумкин бўлган Россия манфаатларига беихтиёр хизмат қилишмоқда. Шунингдек, улар Европа Иттифоқи манфаатларини нотўғри талқин қилишмоқда”, дея таъкидлади Орбан.
Бош вазирнинг таъкидланишича, Венгрия ҳукумати Украинадаги можаронинг бошиданоқ уни тинч йўл билан ҳал қилиш тарафдори бўлган ва Европа Иттифоқининг бошқа мамлакатларидан фарқли ўлароқ, Украина армиясини қурол-яроғ билан таъминлашдан бош тортган. Шу билан бирга, у Россиянинг ҳаракатларини қоралаган ва Украина суверенитетини қўллаб-қувватлашини тасдиқлаган. Венгрия ҳукумати қўшни давлатга иқтисодий ва гуманитар ёрдам, жумладан, қочқинларга кўмак кўрсатмоқда.
Изоҳ (0)