Венгрия ҳукумати Украинага Европа тинчлик жамғармасидан берилиши режалаштирилган навбатдаги ҳарбий ёрдам траншини ажратишни маъқулламади, деб хабар бермоқда Reuters ҳукумат матбуот хизматига таяниб.
“Венгрия Европа Иттифоқи бошқа мавжуд воситалар қатори Европа тинчлик жамғармасидан фақат Украина учун фойдаланилишига рози эмас, чунки бу бошқа соҳаларда Европа Иттифоқи манфаатларини илгари суриш учун етарли маблағ ажратиш имконидан маҳрум қилади”, — дейилади матбуот хизмати хабарида.
Венгрия ҳукумати ЙТЖдан саккизинчи ёрдам траншининг ажратилишига бошқа муаммоларни намоён қилиш учун тўсқинлик қилганини таъкидлади. Венгрия вакиллари жамғарма маблағларидан Болқон ва Шимолий Африкада фойдаланиш мумкинлигини таъкидлади.
Венгриянинг Украинага ёрдам ажратилишини блоклаш қарори ҳақида биринчи бўлиб Италиянинг ANSA агентлиги манбаларга таяниб хабар берган. Унга кўра, ёрдам миқдори 500 миллион еврони ташкил қиларди.
Европа тинчлик жамғармаси 2021 йил март ойида ташкил этилган. У Европа Иттифоқига аъзо давлатларнинг бадаллари ҳисобидан молиялаштирилади. Жамғарма доирасида Украина Европа Иттифоқидан 3,6 миллиард еврога яқин маблағ олди. Украинадан ташқари, ЙТЖ қатор давлатларга, жумладан Грузия, Молдова, Мали, Сомали ва Ливанга мудофаа ёрдамини молиялаштириб келган.
Европа Иттифоқи ва НАТО аъзоси бўлган Венгрия Россиянинг кенг кўламли босқинидан сўнг Украинага бирорта ҳарбий ёрдам кўрсатишдан бош тортди, шунингдек, бир қатор санкциялар жорий этилишига қарши чиқди. 2022 йилда Венгрия Украинага 18 миллиард евролик ёрдам дастурини блоклаган. Бундан ташқари, март ойида Венгрия Россия президенти Владимир Путинни ҳибсга олиш бўйича халқаро ордер тўғрисидаги Европа Иттифоқининг қўшма баёнотини блоклаган.
Изоҳ (0)