Парижда бўлиб ўтган “хоҳловчилар коалицияси” саммити иштирокчилари Украина мустаҳкам ва адолатли тинчликка эришгунга қадар уни ҳарбий, молиявий ва энергетик жиҳатдан қўллаб-қувватлашни кучайтириш бўйича келишувга эришди. Бу ҳақда DW нашри Европа иттифоқи дипломатига асосланиб хабар бермоқда.
31 давлат, шунингдек, Европа иттифоқи ва НАТО вакиллари иштирок этган учрашувда Киевга кўрсатилаётган ҳарбий, молиявий ва энергетик ёрдам кучайтирилиши, шунингдек, Россияга қарши мудофаа уруши олиб бораётган мамлакатни тиклашда кўмаклашиш режалари эълон қилинди.
Саммит иштирокчилари Украинага қўшимча 17 миллиард евро миқдорида ҳарбий ёрдам ажратиш, Киевга 2 миллион дона артиллерия ўқ-дорисини етказиб бериш ва Европа иттифоқига аъзо давлатлар томонидан кўрсатилаётган ёрдам Украина эҳтиёжларига мос келиши учун ўзаро мувофиқлаштиришни яхшилаш мажбуриятини олди. Бундан ташқари, Европа раҳбарлари Украина мудофаа саноати билан ҳамкорликни кучайтириш ва Украина ҳарбийларини тайёрлаш бўйича ЕИ миссиясини ривожлантиришни давом эттириш тўғрисида келишиб олган.
Учрашувда иштирок этган Украина президенти Владимир Зеленский иттифоқчиларни бир қатор саволларга аниқ жавоб беришга чақирган.
“Узоқ муддатли хавфсизлигимизни таъминлашда кўрсатган самимий ёрдами учун Франция, Буюк Британия ва барча иштирокчиларга миннатдорлик билдираман. Украинада қуруқликда, ҳавода ва денгизда қайси давлатлар иштирок этади? Бу кучлар айнан қаерга жойлаштирилади? Уларнинг сони ва тузилиши қандай бўлади? Коалициямиз Украинада кучларни қачон жойлаштиради — сулҳ бошланганида ёки уруш тўлиқ тугатилгач, келишувга эришилганда? ”, деди Владимир Зеленский.
Изоҳ (0)