Польшанинг янги сайланган президенти Карол Навроцкий Украинанинг Европа Иттифоқига қўшилишига қарши чиқди. Бу ҳақда Mandiner газетасига берган интервьюсида қайд этиб ўтди.
Брюсселнинг Киевнинг Европа Иттифоқига тезроқ қўшилиши ҳақидаги чақириқларига қандай муносабат билдириши сўралганида Навроцкий: “Ҳозирда мен Украинанинг Европа Иттифоқига қўшилишига қаршиман”, деб жавоб берди.
У бир томондан Европа давлатлари можарода Киевни қўллаб-қувватлаётганини, бироқ “Украина Польша ва Венгрия каби давлатлар ҳамда бошқа Европа давлатларининг ҳам ўз манфаатлари борлигини тушуниши керак”лигини айтди.
Шунингдек, у сайловолди ташвиқотида ҳам Польша бозори Украина қишлоқ хўжалиги маҳсулотлари билан тўлиши сабабли полшалик ишлаб чиқарувчилар учун ноҳақ рақобат юзага келишига қарши чиққанини таъкидлаб ўтди.
Навроцкий Украинанинг тарихий муаммолар ҳал қилинмагунча НАТОга аъзо бўлишига ҳам қарши чиққан. Қўшни республика “Волиндаги поляклар геноциди” учун жавобгарликни тан олиши керак, деб ҳисоблайди.
Украинанинг Европа Иттифоқига аъзо бўлишига Венгрия ҳам қарши чиққанди. Бу “туганмас уруш”га олиб келиши мумкин, деган эди бош вазир Виктор Орбан.
Консерватор Карол Навроцкий Польшадаги президентлик сайловининг иккинчи босқичида 50,89 фоиз овоз билан ғалаба қозонганди. Навроцкий Украинага нисбатан қарама-қарши муносабатда. Навроцкийнинг позицияси Украина президенти Владимир Зеленский томонидан танқид қилинганди. У агар Украина Европа Иттифоқи ва НАТОга аъзо бўлмаса, Польша раҳбари “қўлида қурол билан ўз мамлакатини Россиядан ҳимоя қилиши” кераклигини айтганди.
Изоҳ (0)