Европа Иттифоқи расмийлари шу ҳафта Украинага ҳарбий ёрдамни блокдан чиқариш бўйича янги режани кўриб чиқишни бошлайди, деб ёзди The Wall Street Journal 19 январь куни тақдим этилган режа лойиҳасига таяниб. Режа ҳақида биринчи бўлиб Bloomberg хабар берганди.
Ташаббусга кўра, махсус жамғарма ташкил этилиб, унга Европа тинчлик жамғармасидан 6,5 миллиард евро ажратилади, 2024—2027 йилларда эса йилига беш миллиард евро ўтказилади.
ЕИ мамлакатлари янги жамғармадан тушган маблағни Европа Иттифоқи давлатларининг Украина учун қурол-яроғ – дрон, ҳаво ҳужумидан мудофаа ракеталари ва ўқ-дориларни биргаликда сотиб олиш харажатларини қоплаш учун ишлатишни режалаштирмоқда. Шунингдек, маблағнинг бир қисми Украина ҳарбийларини Европа Иттифоқида ўқитишни молиялаштиришга йўналтирилади.
Агар ЕИ янги режани маъқулласа, аъзо давлатлар Украинага келаси тўрт йил ичида кўрсатадиган “ўнлаб миллиард евро” ҳарбий ёрдам эвазига ЕИ маблағларидан 20 миллиард евродан ортиқ маблағни ўз бюджетларига қайтариши мумкин бўлади.
Режа лойиҳасида Европа Иттифоқи давлатлари 2024 йилдаёқ ҳарбий ёрдам учун 7,5 миллиард евро миқдорида товон пули олиши кўзда тутилган.
“Украинанинг ташқи ёрдамга қарамлигини ҳисобга олсак, Европа Иттифоқи мамлакатлари ва ҳамкорларининг келгуси даврда қилган танловлари Украинага ё қатъий олға силжиш имконини беради ёки унинг қаршилик кўрсатиш қобилиятига жиддий путур етказади”, — дейилади WSJ томонидан келтирилган режа лойиҳасида.
Европа Иттифоқи етакчилари бу таклифни 1 февралга белгиланган саммитда кўриб чиқиши кутилмоқда.
- Россия қўшинларининг Украинага кенг кўламли босқини бошланганидан бери Европа Иттифоқи давлатлари Киевга умумий қиймати 3,5 миллиард евро бўлган еттита ҳарбий ёрдам пакетини маъқуллади, шунингдек, ўқ-дорилар етказиб бериш учун икки миллиард евро ажратди. Олти ойдан кўпроқ вақт давомида Россияга дўст Венгрия ҳукумати Украинадан уруш билан боғлиқ бўлмаган имтиёзлар талаб қилиб, Европа тинчлик жамғармасидан ҳар қандай тўловларни блоклаб келмоқда.
- Европа Иттифоқи ва НАТО аъзоси бўлган Венгрия кенг кўламли уруш бошланганидан кейин Украинага ҳарбий ёрдам беришдан бош тортди. 2022 йилда Венгрия ҳукумати Украинага 18 миллиард евролик ёрдам дастурини блоклади. 2023 йилда Венгрия Россия президенти Владимир Путинни ҳибсга олиш бўйича халқаро ордер бўйича Европа Иттифоқининг қўшма баёнотини блоклади. Бундан ташқари, декабрь ойида Венгрия бош вазири Виктор Орбан Украинага 50 миллиард евро миқдорида иқтисодий ёрдам ажратиш қарорига вето қўйди.
Изоҳ (0)